Nga Boldnews.al
Është përhapur keq virusi në vend. Ndërsa çdo ditë shtohen rastet me “COVID-19”, deri më sot 333 raste, prej të cilëve 18 qytetarë fatkeqësisht kanë humbur jetën, kryebashkiakun e Tiranës Erion Veliaj nuk e ndal më askush në shitjet pafund të propagandës mjaft të ulët dhe të dëmshme për trurin njerëzor, po aq sa vurusi pandemik në mushkëri.
Me qese ushqimesh në duar, Erion Veliaj po blen jo vetëm varfërinë, por po siguron pafund “aksione” propagandistike, për ti hedhur më pas në tregun publik, me dhe pa licensë, në një qëllim të vetëm: të mbulojë paaftësinë, por edhe shpërdorimin e madh në zhulin që ka mbuluar kryeqytetin dhe mungesën e dezinfektimit.
Çdo ditë shumë kronika. Lidhje direkte me televizionet “e mëdha” kryesisht në emisionet e mesditës kur Erion Veliaj bëhet shoferi i “ndihmave homanitare”. Me qese ushqimesh, që të mbajnë frymën gjallë jo më shumë se dy ditë, të vafërit janë figurantët e një filmi triller e madje me nuanca horrori, ku duhet t’i përulen kreut të bashkisë, pasi u mban “frymën gjallë”, në këtë izolim kolektiv, që më shumë se masë për të frenuar përhapjen e coronavirusit është një “eksperiment social” qeveritar, deri ku mban popullsia.
Në një automjet të vogël që e drejton vetë në të cilën ndodhen fare pak ushqime, Veliaj shoqërohet nga të paktën katër automjete të tjera të mbushura me administratorë lokal, punonjës të shumë të shërbimit social që vegjetojnë sa për imazh dhe një grup i madh kameramanësh, shkruesish dhe regjisorësh të këtyre pamjeve apokaliptike politike.
Nuk është risi që Veliaj përdor fatkeqësitë natyrore për propagandë personale. Madje këtë frenim nuk mund ta bëjë as vetë kryeministri, që ndonëse kërkon të jetë i vetmi në komunikimin publik, Lalit nuk ka ç’ti bëjë.
Përtej së dukshmes, Veliaj po mbulon me aparencë problemin e vërtetë që ka Tirana. Nëse në çdo qytet apo kryeqytet të botës shihen grupe të mëdha punëtorësh në larjen dhe dezinfektimin e çdo rrugë, parku, apo rrugice banimi, në Tiranë shëtisin sa për propagandë në bulevard tre autojete që spërkasin ujë.
Këtë zhul dhe rrezik të madh epidemie e shkelin me këmbë çdo ditë qytetarët kur dalin nga banesat e tyre në “orarin qeveritar” 05-13.00. Asnjë dezinfektim kundër “COVID-19”, asnjë masë serioze për të zhdukur virusin, por vetëm shfaqje televizive që injektojnë “virus propagandën”.
Kreu i Bashkisë së Tiranës sot ka vënë maskën ndër hundë dhe gjezdis nëpër zonat urbane dhe rurale për të nxjerrë filmin e radhës me metrazh të gjatë dhe të shkurtër. Nevoja është ulëritëse për dezinfektimin e qytetit, ku sipas ekspertëve të shëndetësisë, virusi qëndron disa orë në ambiente të hapura dhe është rrezik i përhershëm për të kontaminuar popullsinë.
Kjo pjesë kruet të bashkisë së Tiranës nuk i intereson edhe pse është kaq jetësore, pasi çdo lagje e dezinfektuar është një siguri më shumë për të shmangur rrezikun e infektimit. Lali Eri sot është i angazhuar i gjithi në nismën: shit, shit, shit, por vetëm një produkt ka në treg, atë të propagandës. Në të vërtetë, nëse propaganda do ishte “vaksinë” kundër coronavirusit me siguri dy “shkencëtarët” e parë në botë që do e përdornin masivisht dhe padyshim me “sukses apsolud” do ishin Edi Rama dhe Erion Veliaj.