Një ditë më parë Ministria e Shëndetësisë deklaroi zbulimin e 12 rasteve të reja me Covid 19 në Durrës, i cili sot regjistron plot 26 të infektuar.
Durrësi renditet në vendin e dytë pas Tiranës, lidhur me numrin e të infektuarve, ndërsa rastet e reja i përkasin 4 familjeve të një fisi.
Nga gjurmimi i kontakteve të një pacienti të moshuar, 71 vjeç, i cili rezultoi pozitiv ndaj Covid 19, dy ditë më parë, ka rezultuar se 12 të afërm të tij, janë prekur nga koronavirusi.
Familjet janë banorë të Spitallës, e cila duket se është kthyer në një zonë të kuqe për qytetin bregdetar, pasi regjistron numrin më të lartë të të prekurve me Covid 19.
Mësohet se në rastin e Durrësit vijon hetimi epidemiologjik, pasi djali i të moshuarit punonte në një call center, megjithëse nga të dhënat mësohet se ky biznes ka mbyllur aktivitetin në momentin që u vendosën masat kufizuese.
Në total, deri në mesditën e djeshme, numri i të prekurve me Covid 19 ka shkuar në 243 raste, ndërsa 15 persona kanë humbur jetën.
