Nga Boldnews.al
Ministria e Mbrojtjes ka zhvilluar së fundmi një tjetër tender të dyshimtë, me vlerë rreth 500 mijë euro, pas atij 1.5 milionë euro, të fituar nga kompania “Eurovia” shpknj.
Kompania “Xpert System” është shpallur fituese e një tenderi pa garë, për “Blerje materiale mbrojtëse për mbështetjen e personelit të Forcave të Armatosura të angazhuar në përballimin e emergjencës së shkaktuar nga rënia e pandemisë së virusit COVID – 19”.
Vlera e tenderit ishte mbi 400 milion lekë të vjetra pa TVSH (rreth 500 mijë euro në total).
Ky tender është hapur më datë 25 Mars 2020 dhe është zhvilluar me procedurën e negociimit paraprak, pa shpallje, në kuadër të veprimeve emergjente për shkak të pandemisë së Cov-19.
Tenderi është mbyllur një ditë më pas, në të cilin është shpallur fitues “Xpert System”.
Në bazë të të dhënave të tenderit, kompania fituese duhet të plotësojë nevojat e forcave të Armatosura për “antiseptikë dhe dizinfektues, pompa, produkte ushqimore, klor, ujë të pijshëm, doreza njëpërdorimëshe dhe materiale mjekësore të konsumueshme”.
Por, kompania e përzgjedhur nga Ministria e Mbrojtjes, e drejtuar nga Olta Xhaçka, nuk ka asnjë lloj veprimtarie që të përputhet me kërkesat e tenderit.
Kompani kompjuterash
Kompania “Xpert System” është krijuar në Mars 2015, me ortakë Renald Gova dhe Darin Gezdari.
Kompania ka si objekt të aktivitetit të saj gjithçka që lidhet me pajisjet kompjuterike. Në përshkrimin e gjatë të objektit të saj, sipas ekstraktit të Qendrës Kombëtare të Regjistrimit (QKR), “Xpert System” merret me “Import dhe eksport, instalim, mirëmbajtje, tregti me pakicë dhe shumicë të pajisjeve kompjuterike, kancelarike, telefonike, elektronike, mekanike, të telekomunikacionit, elektrike, hidraulike…”.
Gjithashtu, kompania ka në aktivitetin e saj “Shpërndarje interneti. Krijim dhe mirëmbajtje faqesh interneti. Krijim dhe shpërndarje programe kompjuterike. Konsulencë teknike dhe riparim pajisje kompjuterike dhe elektronike. Shërbim Printimi. Tregtim, import dhe eksport, instalim, mirëmbajtje dhe tregtim i sistemeve të fonise, sistemeve të alarmi..”.
Pra, konstatohet lehtësisht se “Xpert System”, në aktivitetin e saj, nuk ofron asnjë shërbim për dizinfektues, produkte ushqimore, klor, ujë të pijshëm, doreza njëpërdorimëshe apo materiale mjekësore të konsumueshme, të gjitha këto mallra që kërkoheshin nga Ministria e Mbrojtjes në tenderin pa garë, me vlerë 500 mijë euro.
Është e paqartë se përser Ministria e Mbrojtjes ka përzgjedhur “Xpert System”, e cila nuk mund të ofronte shërbimin e kërkuar, referuar të dhënave zyrtare mbi aktivitetin e saj tregtar.
“Xpert System”, bileta me urgjencë për “Rozafën”
Kompania ‘Xpert System” është shpallur, së fundmi, fituese edhe e një tenderi tjetër urgjent dhe të çuditshëm, të zhvilluar nga Drejtoria Rajonale e Kulturës Shkodër, strukturë në varësi të Ministrisë së Kulturës.
Në 12 Mars 2020, pra vetëm një ditë pas qeveria nxori Aktin Normativ për kufizimin e tubimeve për shkak të pandemisë Cov-19, Drejtoria Rajonale e Kulturës në Shkodër zhvillon tenderin për blerjen e 103 mijë copë bileta elektronike për hyrjen në kalanë e Rozafës.
Tenderi mbyllej një ditë pas hapjes, në datë 13 Mars, duke konfirmuar se ai ishte konsideruar si prioritet nga institucioni prokurues.
Megjithëse me një fond relativisht të vogël, rreth 8 milionë lekë të vjetra, Drejtoria Rajonale e Kulturës Shkodër kishte vendosur ta zhvillonte sa më shpejt, pavarësisht se askush nuk do të mund të hynte në Kalanë e Shkodër.
Në 11 Mars 2020, pra një ditë para tenderit për 103 mijë bileta hyrjeje për në kalanë e “Rozafës”, Qeveria miratoi Aktin Normativ nr. 2, në të cilin parashikoheshin penalitete për institucionet publike e private që organizonin aktivitete me pjesëmarrje masive të qytetarëve.
Kalatë dhe muzetë përfshiheshin në këto kufizime, si vende që mbledhin shumë qytetarë. Por, pikërisht, në ato ditë, Drejtoria Rajonale e Kulturës Shkodër vendos të zhvillojë tenderin e biletave, në të cilën shpallet fitues “Xpert System”.
