Partia Demokratike akuzoi Qeverinë se edhe 2 javë pas mbylljes së kufijve me Italinë, nuk ka asnjë plan për kthimin e shqiptarëve.
Sekretari për Marrëdhëniet me Jashtë i PD-së, Arben Kashahu, tha se shqiptarëve nuk mund t’u mohohet e drejta per t’u kthyer në vendin e tyre, pasi ajo është një e drejtë kushtetuese.
“Shteti është i detyruar të vendosë në funksion të këtij qëllimi të gjitha mjetet dhe mundësitë për të realizuar shpëtimin e qytetarëve të tij. Është e papranushme, cinike dhe jo-shtetare përgjigja e kryministrit se nuk ka më vende për Shqiptarët për t’i kthyer në vendin e tyre”, tha Kashahu.
Sipas tij, një Kryeministër i përgjegjshëm duhet të kishte kuptuar se askush nga shqiptarët jashtë Shqipërisë nuk kërkon të bëjë shëtijtje këto kohë të vështira, por janë në pamundësi për të jetuar në vendin që kjo kohë I ka gjetur, kanë prindërit apo njërëz të pamundur në Shqipëri vetëm e pa përkujdesje, e me qindra motive të tjera të justifikuara për t’u kthyer.
Në vijim ai publikoi edhe pergjigjen që Konsullja e Përgjithshme Anila Pojani i ka kthyer një qytetari me sëmundje të rëndë, i mbetur në Itali pas një operacioni të vështirë.
“Përgjigja është e datës 27 mars. Aty thuhet se “për qytetarët e Italisë nuk ka plan aktiv për t’u kthyer.”
Kashahu tha se po ballafaqohemi me një qëndrim arrogant e jo-njerëzor të Kryeministrit në kufijtë e absurdit.
“Ky absurditet merr përmasa krimi shtetëror për faktin se qeveria I ka të gjitha mundësitë për të realizuar këtë operacion shtetëror.
Kjo është dita kur vendi ka më shumë nevojë për të përdorur shërbimin e ambasadave dhe të linjës ajrore shtetërore “Air Albania””, tha Kashahu.
