Kryeministri Edi Rama njoftoi sot se ditën e hënë do të nisë operacioni, sikundër e quajti ai, për kthimin në atdhe të shqiptarëve që kanë mbetur në vende të ndryshme të Europës, si pasojë e mbylljes së kufinjve për shkak të koronavirusit.
Rama njoftoi se fluturimet do të realizohen nga Air Albania, ndërsa shqiptarët nuk do të paguajnë për biletat e udhëtimit.
Ky vendim i bërë publik sot nga Rama, në fakt i është propozuar 9 ditë më parë nga ish-deputeti Genc Pollo.
Rama sot nuk dha shpjegime sepse nuk kishte marrë parasysh propozimet që iu bënë më 18 mars nga Pollo, i cili gjithashtu i sugjeronte Kreut të Qeverisë të përdorte avionët e Air Albania për kthimin në atdhe të shqiptarëve.
Plot 9 ditë shqiptarët ne disa vende të Europës kanë mbetur ose në aeroporte ose rrugëve, ndërkohë që zgjidhjen e njoftuar sot mund t´a realizonte edhe më parë.
“Pse qeveria nuk përdor Air Albania-n për të sjellë në Shqipëri udhëtarët e ngecur në Europë?
Kriza e koronavirusit, ndërprerja e fluturimeve nga linjat ajrore e mbyllja e kufijve në Europë zuri në befasi dhjetra mijë udhëtarë që po orvaten mes vështirësive të kthehen në shtëpi. Qindra bashkëatdhetarë tanë kanë ngecur nga Spanja në Suedi e më gjerë dhe nuk po gjejnë dot fluturim kthimi.
Çdo shtet po tenton t’i ndihmojë. Qeveria austriake ka pajtuar Austrian Airlines që të bëje fluturime riatdhesimi deri nga Tenerife në Atlantik.
A nuk mundet qeveria shqiptare të angazhojë Air Albania-n për fluturime të tilla nga aeroportet ku kemi qindra shqiptarë që presin? E ka më të kollajtë pasi është kompani që e ka themeluar me vendim të saj e ku shteti është bashkaksioner (ndërkohë që Austrian është private, pa aksione të shtetit).
A nuk është rasti për të përdorur për mirë një kompani me origjinë problematike? Për të kompensuar disi mëkatin fillestar?”, shkruante Pollo në rrjetet sociale 9 ditë më parë.
Ndërsa sot ishßdeputeti i PD-së, Genc Pollo, duke reaguar ndaj vendimit të bërë publik nga Rama shkruan “9 ditë më parë, në emër të Partisë Demokratike, kërkova që qeveria të përdorë avionët e Air Albania per të sjellë në Shqipëri udhëtarët e mbetur në Europë. Qeveria e ka pranuar më në fund edhe këtë propozim tonin. Më mirë vonë se kurrë. Të paktën, nuk do të jenë më të diskriminuar dhe të harruar nga shteti i tyre”.
