Epidemiologu Ilir Alimehmeti u shpreh mëngjesin e sotëm se transparenca është mjaft e rëndësishme në rastin e Covid 19.
Alimehmeti u shpreh se duhet të jepen informacione se ku bëhen testet, pra në cilat zona, ashtu sikundër ndodh në Kosovë, për të krijuar një ide më të mirë mbi përhapjen e Covid 19.
Ai tha se Shqipëria ende nuk ka hyrë në kurbën e pikut, pasi rastet janë ende në nivele të ulëta.
Mjeku i njohur tha se numrat e të identifikuarve me Covid 19 kanë lidhje me numrin e popullatës, p.sh Tirana është porta, dhe rrjedhimisht do ketë një numër më të madh të të infektuarve.
Epidemiologu tha se testet duhet të përqëndrohen te personat e kontaktit, pra të gjurmohen, personat që kanë pasur kontakte me personin e infektuar dhe këtu varet cilësia e gjurmimit.
“Karantinimi apo bllokimi i lëvizjes synon ndalimin e rritjes eksponenciale, e cila është 2.4 fish, në mënyrë që ne mos të mbingarkojmë spitalet, në mënyrë që personat që do të hospitalizohen të mund të marrin shërbimin e duhur.
Ne këtë virus nuk e ndalim dot, por t´a shtrijmë në kohë”, tha Alimehmeti për Abcnews.
Ai tha se ajo që dihet deri më tani se 80 % e të infektuarve nuk kanë asnjë shenjë, por ky është një lajm i keq për të vjetrit, pasi një person pa shenja mund të infektojë moshat e vjetra.
Lidhur me numrin e vdekjeve që deklarohen si pasojë e Covid 19, Alimehmeti tha se e vetmja që përcakton shkakun e vdekjes është mjekësia ligjore.
“Në të gjithë ato mijëra vdekje që ka në Itali, vetëm 3 janë pa sëmundje të tjera, pra që mund të thuhet se janë viktima të Covid 19.
Ai tha se “pritshmëria e jetës në Itali është shumë më e lartë se në Shqipëri, por këtu ka shumë më tepër viruse në qarkullim, që mund të jetë një nga pistat e studimeve, por imuniteti i shqiptarëve është më i lartë, për faktin e përballjes me këto viruse. Ndaj dhe mendoj se këndi i rritjes në Shqipëri është më i ulët dhe do jetë, sipas projeksioneve më i ulët”.
