Ruani distancën nga njëri – tjetri për të mirën e shëndetit të të gjithëve. Është ky apeli i Policisë së Shtetit drejtuar qytetarëve, ndërsa nga dita e sotme, forca policore dhe ato të ushtrisë janë angazhuar për mbajtjen e rregullit dhe ruajtjen e distancës së qytetarëve nëmarkete, banka apo pika të tjera shërbimesh.
Vendimi është marrë referuar denoncimeve se një ditë më parë pati dyndje të qytetarëve në markete apo banka, duke mos respektuar distancat sociale, që konsiderohen si vendimtare në parandalimin e përhapjes së Covid 19 në Shqipëri.
“Në të gjithë vendin punonjësit e Policisë së Shtetit janë angazhuar në zbatimin e masave kufizuese me qëllim parandalimin e përhapjes së COVID-19
Patrullat e Përgjithshme të Policisë, në oraret e lejuara janë të pranishme pranë bankave, supermarketeve dhe marketeve, ku ka dhe grumbullime të qytetarëve, me qëllim ruajtjen e distancës së duhur, për të bërë të mundur parandalimin e përhapjes së COVID-19.
Policia e Shtetit u bën thirrje të gjithë qytetarëve të ruajnë distancën nga njëri- tjetri, të respektojnë oraret e lejuara të lëvizjes, si dhe të evitojnë daljet nga shtëpia pa pasur arsye thelbësore e jetike”, thuhet në mesazhin e Policisë.
