Nga Beqaj te Fusha, Zoto e Salillari/ PD publikon dokumentet: Ja si Rama shpërndau 51.5 mln euro

Partia Demokratike, përmes ish-deputetit Enkelejd Alibeaj, ka publikuar dokumente, sipas të cilave kompanitë e preferuara të Edi Ramës marrin tendera edhe në javën e ferrit të koronavirus.

Alibeja tha se ndërsa shqiptarët janë vendosur në karantinë për t’i bërë ballë COVID-19, kur bizneset kanë mbyllur dyert dhe po luftojnë një luftë ndaj Covid 19, Edi Rama dhe Erion Veliaj kanë vazhduar të tenderojnë projektet për betonimin e Tiranës.

“Pjesa e Parkut të Liqenit, ku aktualisht ndodhet godina e Gardës së Shqipërisë, është shpallur si i hapur në garën e Bashkisë të publikuar këto ditë karantinimi.

Sipas të dhënave të publikuara, Bashkia Tiranë ka hapur tenderin për ndërtim tek Garda, në mushkërinë e vetme të qytetit të Tiranës. Të dhënat tregojnë se Bashkia e TIranës po tenderon këtë projekt me një vlerë prej 1.8 milionë euro, duke shtyrë ditën e aplikimit deri në 27 mars 2020”, tha Alibeaj.

Sipas PD, ndërsa qytetarët janë vendosur në karantim dhe në ankthin për të shpëtuar nga koronavirusi, virusi i betonimit vazhdon të kafshojë shqiptarët dhe veçanërisht Tiranën.

Referuar dokumenteve të publikuara nga PD, edhe kompania tjetër e inceneratorëve të Elbasanit, zotëruar nga Klodian Zoto, Albtech Energy, ka marrë në 12 mars 2020 nga buxheti i Ministrisë së Infrastrukturës dhe Energjisë dy këste me vlerë totale 800 mijë euro.

LEXO EDHE  Basha: Me taksën e sheshtë 9% lekët shkojnë për konsumin ...

“Kompania FUSHA shpk e përfshirë në ndërtimin e kullave aty ku sot ndodhet Teatri Kombëtar ka marrë në 12 mars 2020 173 mijë euro (21 mln lekë) nga taksat e shqiptarëve. Kompania e policisë private të Sandër Lleshaj, Illyrian Guard ka shpenzuar nga buxheti i shtetit 62 mijë euro (8 mln lekë).

Kompania Salillari shpk ka përfituar në mars 218 mijë euro (26 mln lekë) duke qenë ofertë e vetme, njësoj siç ka përfituar edhe 16 mijë miku i afërt i Ramës, Alban Eftimi, dhe një tjetër tender me vlerë 418 mijë euro (50 mln lekë) të paguar në mars 2020”, tha Alibeaj.

Ai akuzoi Ramën se në një kohë kur bota po ushtron presion dhe po çliron shuma të mëdha në ndihmë të ekonomisë, Kryeministri u hedh paratë e shqiptarëve të karantinuar miqve të tij.

Alibeaj tha se gjithashtu mbi 6 mijë euro fonde i janë kaluar kompanisë së Ilir Beqjes brenda datës 17 mars 2020.

“Në total vlerat e hetuara deri më tani kapin shumën e 51,5 mln eurove dhe që po u shkojnë ose kompanive që kanë pasur një ofertë të vetme apo dhe miqve të qeverisë”, tha ai.