Tetë vite të jetës së tij Zlatan Ibrahimoviç i ka kaluar në Itali dhe siç tregon po vetë, Italia është një vend që ai e ka për zemër.
Aktualisht vendi ynë fqinj është ai që po vuan pasojat më të rënda në kontinentin e Europës për shkak të coronavirusit dhe Zlatan Ibrahimovich zotohet se do të bëjë gjithçka për vendin që i ka dhënë aq shumë atij.
Në një mesazh të shpërndarë në rrjetet sociale Ibrahimovic deklaron se do të krijojë një fond për të ndihmuar spitalet dhe se do të përdorë influencën e tij të madhe për ta përhapur mesazhin sa më shumë. Duke mos i lënë mënjanë dhe batutat, Ibra deklaron se nëse coronavirusi nuk vjen te ai atëherë ai do të shkojë te coronavirusi.
“Italia më ka dhënë shumë mua dhe në këtë moment dramatik dua t’i kthej pas edhe më shumë këtij vendi që unë e dua. Vendosa, së bashku me njerëzit që punojnë me mua, të krijojmë një fond për të ndihmuar spitalet dhe të përdor fuqinë time të komunikimit për ta përhapur mesazhin sa më shumë”.
“Është një çështje serioze dhe na duhet një ndihmë konkrete, kjo nuk ka të bëjë me një video. Unë mbështetem në bujarinë e kolegëve të mi, të të gjithë sportistëve profesionistë dhe të atyre që duan të japin një donacion të vogël apo të madh, sipas mundësive të tyre, për ta larguar këtë virus”.
“Së bashku mund të ndihmojmë realisht spitalet, doktorët dhe infermierët që punojnë duke mohuar veten çdo ditë, me synimin që të shpëtojnë jetët tona. Sot jemi ne ata që brohorasim për ta. le ta godasim të gjithë së bashku Coronavirusin dhe ta fitojmë këtë ndeshje. Dhe mbajeni mend këtë: Nëse virusi nuk shkon te Zlatan, Zlatan shkon te virusi”, shkruan suedezi.
DENONCO