Kanë përfunduar dy ndeshjet e orës 14:00 të Kategorisë Superiore. Teuta dhe Bylisi kanë dalë të zhgënjyera nga ndeshjet e tyre respektive ndaj Flamurtarit dhe Luftëtarit, teksa janë ndalur në barazim me të njëjtin rezultat 1-1.
Në Durrës ndeshja ishte e hapur pasi Teuta dhe Flamurtari luftuan shumë për të marrë pikët e plota, por në fund u detyruan të mjaftohen me nga një pikë. Vlonjatët arritën të befasojnë shumë shpejt dhe ishte Shaqir Haruni që me një lëvizje mjaft të bukur shtangu portierin Frashëri dhe shënoi.
Hoxhaj iu afrua edhe golit të dytë, por portieri i Teutës nuk e lejoi diçka të tillë. Fraksioni i parë i lojës u mbyll me epërsinë e Flamurtarit, kurse më pas durrsakët u hodhën në sulm për të gjetur golin e barazimit.
Shumë shpejt morën një penallti, që u godit nga Kallaku. Portieri Moçka e priti, por Çyrbja e gjurmoi topin dhe shënoi golin e barazimit. Hoxhaj më vonë për vlonjatët goditi traun, ndërkohë që durrsakët patën disa raste për të shënuar, pa ia dalë dot. Kështu gjithçka u mbyll në barazim 1-1.
Nga ana tjetër Bylisi nuk i ndahet barazimeve. Ballshiotët e Dovedan sërish nuk ia dolën të fitojnë në kampionat. Edhe pse shënuan të parët, me një penallti të kthyer në gol nga Guindo, Bylisi nuk triumfoi. Gresild Lika në fund të pjesës së parë i ndëshkoi miqtë me një goditje dënimi. Sulmuesi anësor mund të shënonte sërish, por u ndal nga portieri Miraka. Goxha për Bylisin iu afroi golit të epërsisë, sikurse edhe Çela për Luftëtarin. Raste të shumta pati deri në fund, por rezultati 1-1 nuk ndryshoi.
