Rrëfehet Ngo: Ndaj Flamurtarit kisha frikë, në Vlorë rrezikonim sezonin

Michael Ngo është një tjetër lojtar, i cili ka bërë sakrifica për Tiranën dy javët e fundit. Gripi, dëmtimi, por edhe problemet e shumta kanë bërë që Ngo të luajë katër ndeshje me katër stërvitje në këmbë.

Dhe në Vlorë ai ishte njeriu i sfidës që vendosi takimin duke nxjerrë nga balta bardheblutë me galopimin që çoi skuadrën te goli i parë.

Në një intervistë për “Panorama Sport”, Ngo sqaroi se sfida me Flamurtarin ishte nga më të vështirat që kishte luajtur këto javë. “Duhet ta pranoj që kemi luajtur keq. Nuk kemi dhënë as 50 për qind të vetes sonë në Vlorë. Ishte një ndeshje e keqe, por që duhej fituar”.

“E kishim për detyrim të fitonin. Nëse ngecnim në Vlorë, ishim “të mbaruar” në çdo drejtim dhe do të kishim prishur gjithë punën”.

“Asnjë nuk e beson, por me Flamurtarin ishim të rraskapitur psikologjikisht nga derbi. Ishte një kohë e shkurtër dhe ngarkesa mendore do kohë që të shkarkohet”, është shprehur dje Majkëll Ngo për “Panorama Sport”.

LEXO EDHE  Kallaku vlerësohet te Lokomotiva: Na bashkohet një prej talenteve më të mëdhenj shqiptarë