Presidenti Ilir Meta doli sot në një konferencë për mediat nga ku iu përgjigje deklaratave dhe qëndrimeve të Kryeministrit Edi Rama, i cili akuzon Kreun e Shtetit, se me letrën drejtuar Komisionerit për Zgjerimin, synon të bllokojë procesin e hapjes së negociatave për Shqipërinë, sikundër ka rekomanduar Komisioni Europian.
Meta u pyet sot nëse mund të hapen ose jo negociatat, ndërsa theksoi se me skandalet që ndodhin këtu rruga vështirësohet.
“Këta i kanë harruar kriteret e Kopenhagenit, me këto skandale rruga do vështirësohet. Ti thërrasi mendjes dhe të mos krijojnë alibi. Presidenti thotë që të na çelen nga dje, e jo më sot. E mbani mend Edi Ramën kur ishte në opozitë që bllokoi procesin për 3 ligje? I thashë do koalicion, hajde voto ligjet. Ky ishte kushti i vetëm në atë kohë, pasi nuk e dija që mazhoranca që do vinte në 2013 mund të fitonte ose jo 84 mandatet dhe opozita mund të bllokonte prapë procesin”, tha Meta.
Në vijim ai e konsideroi si një vijë të kuqe integritetin e Gjykatës Kushtetuese.
