Ish-ministri i Drejtësisë, Ylli Manjani, përmes një postimi në rrjet shkruan se policimi dhe hetimi penal duhet të jenë funksione të ndara.
Manjani shkruan se kjo është krejt e mundur të realizohet mjafton që BKH, të jetë në varësi jo vetëm të SPAK por edhe të Prokurorisë së zakonshme, pra të jetë përgjegjëse për hetimin penal të çdo vepre penale.
“Pa dyshim, pa dëmtuar aspak statusin e veçantë të SPAK. Por duke krijuar një BKH më të madhe që të mbulojë të gjithë territorin dhe të hetojë çdo vepër penale.
Duke e nxjerrë kështu policinë në detyrën e saj të pastër ekzekutive.
Kjo duhet të jetë reforma reale e drejtësisë penale, sipas mendimit tim.
Është krejt e mundur. Mbi të gjitha e domosdoshme”, shkruan Manjani.
Postimi nga Ylli Manjani
Kam qenë dhe mbetem i mendimit se policimi dhe hetimi penal duhet të jenë funksione TË NDARA.
Polici është ruajtës rendi dhe zbatues u urdhërave të Prokurorit. Ky i fundit është zot i dosjes hetimore dhe në vartësinë e tij duhet të jenë hetues profesionistë, jo policë.
Hetimi është profesion më vete. Ai kërkon inteligjencë e mjete, po mbi të gjitha pavarësi politike reale dhe profesionalizëm. Hetimi nuk është zhurmë, as tundje prangash por mbledhje provash.
Vetëm me prova bëhet drejtësia dhe mundet realisht krimi.
Policia nuk ka asnjë shanc ta ofrojë këtë shërbim. Ajo, pra Policia, mund dhe duhet të bëjë mirë ruajtjen e rendit dhe zbatimin profesional të urdhërave të drejtësisë.
Shihni realitetin për më shumë. Kemi një shërbim të tejfryrë policor, aq sa është krijuar ideja që ky shtet ka vetëm polic. Polic që arrestojnë njerëz sipas qejit, që prishin shtëpi, rrahin njerëz, sekuestrojnë prona, përgjojnë qytetarë e zyrtarë, madhe japin edhe pasaporta e karta identiteti. Pra polica bën çdo gjë!
Sado e aftë të jetë policia, prap nuk bën dot çdo gjë. Është e pa mundur. Prandaj funksionet ndahen sepse ndarja krijon profesionalizëm.
Krimin e lufton drejtësia. Policia thjesht vihet në shërbim të drejtësisë. Ky është standardi që kam aspiruar dhe aspiroj të vendoset në Shqipëri.
Nuk jemi larg. Është krejt e mundur të vendoset.
Mjafton që BKH, të jetë në varësi jo vetëm të SPAK por edhe të Prokurorisë së zakonshme, pra të jetë përgjegjëse për hetimin penal të çdo vepre penale.
Pa dyshim, pa dëmtuar aspak statusin e veçantë të SPAK. Por duke krijuar një BKH më të madhe që të mbulojë të gjithë territorin dhe të hetojë çdo vepër penale.
Duke e nxjerrë kështu policinë në detyrën e saj të pastër ekzekutive.
Kjo duhet të jetë reforma reale e drejtësisë penale, sipas mendimit tim.
Është krejt e mundur. Mbi të gjitha e domosdoshme.
