Është dita më e rëndësishme deri më tani në fushatën presidenciale të 2020-ës në Shtetet e Bashkuara të Amerikës. 14 shtete dhe Samoa amerikane votojnë sot për kandidatin e preferuar demokrat, në atë që njihet si “Super e marta”. Fitorja në Karolinën e Jugut në fundjavë, përmirësoi pozitat e Joe Biden.
“Çohuni! Le ta marrim mbrapsht këtë vend. Jemi Shtetet e Bashkuara të Amerikës dhe mund të bëjmë gjithçka të bashkuar”, tha Biden.
Të hënën, ish-zëvendëspresidenti siguroi mbështetjen e kandidatëve të tjerë që u tërhoqën nga gara.
“Nuk mund të mendoj një mënyrë më të mirë për t’i dhënë fund fushatës time”, tha Amy Klobuchar.
Senatorja Elizabeth Warren e kaloi të hënën në shtetin e pasur me delegatë të Kalifornisë. “Duhet të mundim Trump-in dhe të ofrojmë ndryshim real në janar të 2021”, tha Warren.
Ish-kryebashkiaku i Nju Jorkut, Michael Bloomberg tha se duhet te jesh menaxher dhe ekzekutiv për të qenë president. “Unë mund ta mund Trump-in dhe nuk e di nëse ndonjë prej kandidatëve të tjerë është në gjendje ta bëjë”, tha Bloomberg.
Sa i përket kandidatit favorit: “Ne po realizojmë fushatën më të fortë në historinë modern të SHBA-së”, u shpreh Bernie Sanders.
Senatori Bernie Sanders e nis “Super të martën” me më shumë delegatë se Biden.
