Gjatë ditës së sotme, disa aktivistë të Aleancës për Ardhmërinë e Kosovës kanë vendosur para zyrës së Qeverisë një arkivol me disa nga premtimet e kryeministrit Albin Kurti. Kjo ishte një aksion simbolike për “varrosjen e premtimeve” të tij.
Sot është duke u zhvilluar dhe seanca në Kuvendin e Kosovës e thirrur nga AAK-ja ku do të diskutohet për taksën 100% të vendosur ndaj mallrave serbe, ku i pranishëm është edhe Albin Kurti.
Teksa po protestonin para Kuvendit, disa nga aktivistë të AAK-së janë vënë në pranga.
Këtë e ka bërë të ditur deputetja e AAK-së, Teuta Haxhiu, e cila ka thënë se e dënon ashpër një veprim të tillë.
Ndërkohë që, përmes një komunikate për media, ka reaguar dhe vetë Aleanca për Ardhmërinë e Kosovës e cila ka dënuar ashpër arrestimin e aktivistëve të saj
Ata thanë se një veprim i tillë është kundër frymës së Kushtetutës së Kosovës dhe ligjeve në fuqi.
“Dënojmë ashpër aktin e arrestimit të aktivistëve të Aleancës së të Rinjve të AAK-së, të cilët ishin duke realizuar një aksion simbolik kundër heqjes së taksës, para objektit të Qeverisë. Trajtimi policor i qytetarëve të ndershëm, vetëm pse ia kujtojnë Kryeministrit Kurti shkeljen flagrante të parimeve të dikurshme, është kundër frymës së Kushtetutës së Kosovës, dhe ligjeve në fuqi”, thuhet në reagim.
Për këtë ka reaguar edhe lideri i AAK-së, Ramush Haradinaj, i cili ka bërë thirrje që të lirohen të arrestuarit dhe të mos u shkelet e drejta për të kundërshtuar.
“Dënoj ashpër aktin e arrestimit të aktivistëve të Aleancës së të Rinjve të AAK-së, Naim Ramizi, Musa Lekaj, dhe Edonis Kamberi, të cilët ishin duke realizuar një aksion simbolik kundër heqjes së taksës, para objektit të Qeverisë. Trajtimi policor i qytetarëve të ndershëm, vetëm pse ia kujtojnë Kryeministrit Kurti shkeljen flagrante të parimeve të dikurshme, është kundër frymës së Kushtetutës së Kosovës, dhe ligjeve në fuqi. I bëjmë thirrje pushtetit dhe institucioneve të rendit, që të lirojë menjëherë aktivistët e arrestuar, dhe të mos ua shkelë të drejtën e garantuar të kundërshtimit paqësor e politik qytetarëve të Republikës së Kosovës”, ka shkruar ai në Facebook.
