Botuesi, analisti dhe pronari i UET-së, Henri Çili, pritet të njihet me masën e sigurisë, ndërsa ka dalë para Gjykatës së Përmetit.
Ajo që ka tërhequr vëmendjen është se Çili është shoqëruar nën masa të forta sigurie, i rrethuar nga efektivë të policisë nga furgoni deri në ambientet e gjykatës, duke krijuar idenë e një personi me mjaft rrezikshmëri të lartë.
Pamje të tilla nuk janë vërejtur as në rastet kur para gjykatës kanë dalë personazhe të njohur të botës së krimit, çka duket se show ndaj botuesit Çili ka vijuar edhe në qytetin e Përmetit, atje ku qytetarëve i është dhënë mundësia që shikojnë “spektaklin” policor.
Ndërkohë sikundër raportohet seanca e masave të sigurisë do të drejtohet nga Dritan Hasani. Ky i fundit u caktua nga kreu i Gjykatës së Përmetit, pasi gjyqtarja Yrvete Shkreli,e caktuar më parë u përjashtua.
Kërkesa për përjashtimin e gjyqtares u bë nga prokurori Asllan Bajrami. Siç raportohet mes tyre ka pasur një përplasje për ditën se kur do të caktoheshin masat e sigurisë, sot apo të hënën.
Henri Çili, u arrestua gjatë operacionit “Mezhgorani”, mbrëmjen e së enjtes. Bashkë me të u arrestuan avokati Ilir Korbi, biznesmeni Sait Fishta dhe 32 persona të tjerë.
Botuesi akuzohet për disa vepra penale si ajo e ushtrimit të ndikimit te zyrtarë të drejtësisë, pastrimi i produkteve të veprës penale, fshehje e pasurisë etj.
Ndërkohë që ende nuk thuhet zyrtarisht se cili është zyrtari i drejtësisë që botuesi Çili ka ushtruar ndikim për lirimin e dy prej të akuzuarve për vrasjen e policit Ibrahim Basha, gjatë aksionit në Lazarat.
DENONCO