Kryeministri Edi Rama, me cilësinë e kreut të Presidencës së OSBE-së, zhvilloi një vizitë zyrtare në Rusi, ku pati një takim dhe më pas një konferencë për mediat me kreun e diplomacisë ruse, Sergey Lavrov.
Pak para se të niste takimin me Lavrov, Rama është pritur me një protestë, e cila zhvillohej përpara Ministrisë së Jashtme ruse. Protesta ishte në mbështetje të agjencisë ‘Sputnik Estonia’, e cila ka qenë subjekt i një presioni nga autoritetet në vendin Balltik.
Protestuesit ishin veshur me të verdhë, ngjyra e korporatave të Sputnik dhe tubuan para takimit midis ministrit të Jashtëm rus Sergej Lavrov dhe Kryeministrit Edi Rama, i cili është kryetari aktual i Organizatës për Siguri dhe Bashkëpunimi në Evropë (OSBE).
“Estonia është një kamp përqendrimi për gazetarët” dhe “Larg gazetarët në shtetet e Balltikut”, ishin pankartat që mbanin në duar protestuesit, raportojnë mediat.
Sipas portalit në fjalë, “pjesëmarrësit në protestë po prisnin posaçërisht ardhjen e Ramës, me qëllim që të tërhiqnin vëmendjen e tij ndaj presionit me të cilin përballen gazetarët e Sputnik Estonia, të cilët u detyruan të ndërpresin kontratat e tyre duke filluar nga 1 janari, pasi morën kërcënime me burgim, deri në pesë vjet nga autoritetet Estoneze”.
Rusia ka deklaruar më parë se pret që përfaqësuesi i OSBE-së për lirinë e mediave, Harlem Desir, të shtyjë autoritetet Estoneze të rishikojnë politikat e tyre shtypëse kundër gazetarëve të Sputnik në vendin baltik.
Ndërkohë i pyetur në konferencë nga një gazetare e SPUTNIK lidhur me sjelljen e autoriteteve estoneze, Rama, i cili në Shqipëri akuzohet se përmes paketës anti-shpifje synon të verë mediat nën kontroll ose të mbyllë mediat që nuk i kontrollon, tha se “herë pas here, edhe kjo medie ka raportuar të pavërteta lidhur me zhvillimet në Shqipëri”. Por, Rama tha se pavarësisht raportimeve që janë bërë dhe si do të behen, gazetarët e Sputnik do të lejohen dhe respektohen në punën e tyre në Shqipëri.
