Presidenti Ilir Meta ka thirrur një protestë më datën 2 mars në atë që e konsideron si hapin e parë për çmontimin e grushtit të shtetit dhe për mbrojtjen e Kushtetutës. Meta i ka drejtuar një apel shqiptarëve që të shkojnë kuq e zi në këtë protestë, e cila duket se do të mbështetet edhe nga opozita.
Gjithashtu Kreu i Shtetit ka paralajmëruar se në këtë tubim do të firmosë edhe dekretet e para, që me shumë gjasa do të jenë kthimi i ndryshimeve ligjore lidhur me procedurat e betimit të anëtarëve të Gjykatës Kushtetuese dhe asaj të Lartë, por me shumë gjasa edhe anti-KÇK nëse deri në 2 mars miratohet nga Kuvendi.
Protesta e thirrur nga Meta ka shkaktuar reagime të shumta nga mazhoranca e Rilindjes, e cila e lidh atë si veprim me faktin se Presidenti është në proces shkarkimi.
Zv.ministri i Mbrojtjes, Petro Koçi, tha sot në studion e ABCnews se nëse Meta do të kishte merakun e Kushtetutës, këtë duhej t’a bënte në 2 rastet kur u bë pjesë e maxhorancave qeverisëse, një herë me Sali Berishën, pastaj me Edi Ramën.
“Në asnj nga rastet nuk u kujtua për Kushtetutën.
Tani është në konflikt interesi. Ka hallin të ketë numër të mjaftueshëm përfaqësuesish të tij në të, që të bllokojë shkarkimin”, tha Koçi.
Prej disa muajsh, Rilindja në Kuvend ka ngritur një Komision Hetimor parlamentar përmes të cilit kërkon shkarkimin e Ilir Metës nga posti i Presidentit të Republikës. Hetimi parlamentar nisi pasi Meta me një dekret anuloi mbajtjen e zgjedhjeve lokale më 30 qershor, por dekreti u rrëzua me vendim të KQZ-së dhe nuk u mor për bazë. Më pas në çështjen ndaj Metës, Rilindja përfshiu edhe rastin e anëtares së Gjykatës Kushtetuese, Arta Vorpsi, e cila nuk u dekretua nga Presidenti, i cili kërkonte respektimin e procedurave Kushtetuese në zgjedhjen e anëtarëve.
Në 2008, ku u realizuan ndryshimet e para Kushtetuese me konsensusin e PD-PS, Meta në atë kohë Kryetar i LSI-së, bashkë me disa deputetë të tjerë nisën një grevë urie në mjediset e Parlamentit. Kësaj proteste të Metës 12 vjet më parë iu bashkua edhe Petro Koçi, që në atë kohë ishte më afër Ilir Metës se Edi Ramës.
