Dy vendet vakante për SPAK/ Shtyhet me 1 muaj afati i aplikimit

Foto nga mbledhja e KLP, 24 shkurt 2020

Shtyhet me 30 ditë afati për aplikimin për dy vendet vakante në Prokurorinë Kundër Krimit të Organizuar dhe Korrupsionit. Burime zyrtare nga KLP bënë me dije se në mbledhjen e sotme, “Këshilli i Lartë i Prokurorisë vendosi për shtyrjen e afatit të aplikimit për plotësimin e 2 pozicioneve vakante si prokurorë në Prokurorinë e Posaçme kundër Korrupsionit dhe Krimit të Organizuar”.

Më herët, nga KLP është konfirmuar se për 2 vendet vakante në SPAK, kanë shprehur interesi Dritan Prençi, Vladimir Mara dhe Sotir Kllapi.

Në mbledhjen e datës 28 Janar 2020, KLP shpalli thirrjen për aplikimin për plotësimin në mënyrë definitive të dy vendeve vakante në SPAK.

SPAK aktualisht funksionon me 8 prokurorë me mandat 9-vjeçar dhe dy prokurorë të komanduar, Vladimir Mara e Dritan Prençi. Paketa ligjore e Reformës në Drejtësi parashikonte që SPAK të kishte 15 prokurorë dhe numri minimal i nisjes së aktivitetit ishte 10.

Vendimet e KLP

Këshilli i Lartë i Prokurorisë ka zhvilluar sot mbledhjen plenare të radhës, duke vendosur komandimin e dy prokurrovëse si drejtues në akuzën e Gjirokastrës, dhe Apelit të Korçës.

Më konkretisht, Këshilli i Lartë i Prokurorisë, vendosi Ollga Visi, të caktohet përkohësisht në funksionin e Prokurorit të Prokurorisë pranë Gjykatës së Apelit Korçë. Këshilli vendosi gjithashtu që Ollga Visi, të ushtrojë detyrën si Drejtuese në Prokurorinë pranë Gjykatës së Apelit Korçë, përkohësisht nga data 24.02.2020 – 23.05.2020.

Këshilli vendosi me shumicë votash edhe miratimin për caktimin e përkohshëm të Julian Çafka, në pozicionin e Drejtuesit të Prokurorisë pranë Gjykatës së Shkallës së Parë Gjirokastër.

Këshilli i Lartë i Prokurorisë vendosi ndërprerjen e caktimit të përkohshëm të Francesk Ganaj, si prokuror në Prokurorinë pranë Gjykatës së Shkallës së Parë Pukë dhe kthimin e tij në pozicionin e prokurorit në Prokurorinë pranë Gjykatës së Shkallës së Parë Lezhë ku e ka emërimin.

KLP vendosi po ashtu me shumicë votash, miratimin e raporteve për analizimin e aftësive profesionale të subjekteve të rivlerësimit kalimtar, prokurorëve: Abaz Muça, Adriano Dyrmishi, Alketa Zifla, Bledar Maksuti, Enrik Haxhiraj, Marjeta Zaimi, Rozeta Qirjaqi.

LEXO EDHE  “Me ty ka vdekur edhe gjysma ime sot”, emocionon me fjalët djali i ish-kampionit Kurti që vdiq nga koronavirusi

Para Këshillit janë prezantuar opinionet për kandidatët, të cilët kanë shprehur interesin për t’u komanduar pranë zyrës së Inspektorit të Lartë të Drejtësisë. Midis 2 kandidaturave, Këshilli miratoi me 10 vota pro, opinionet për kandidimin e Mirela Kapo.

Me 10 vota pro, janë miratuar edhe prezantimet e opinioneve për kandidatët, të cilët kanë shprehur interesin për t’u komanduar në pozicionin Këshilltar pranë Këshillit të Lartë të Prokurorisë, për një periudhë kohore 3-vjeçare: Ornela Rrumbullaku, Artur Cara, Mihallaq Bleta, Arian Muçaj, Erion Pano dhe Vitjona Mata.

Me 10 vota pro janë miratuar projekt-vendimet për fillimin e procedurës për verifikimin e pasurisë dhe figurës për kancelarët në detyrë në sistemin e prokurorisë dhe projekt vendimet për fillimin e procedurës për verifikimin e pasurisë dhe figurës për kandidatët që kanë shprehur interesin për t’u komanduar si inspektor në ILD, si vijon: Elena Pelushi, Xhevahir Lita, Daniela Sulaj, Sonila Muhametaj Domi.

Këshilli i Lartë i Prokurorisë vendosi për shtyrjen e afatit të aplikimit për plotësimin e 2 (dy) pozicioneve vakante si prokurorë në  Prokurorinë e Posaçme kundër Korrupsionit dhe Krimit të Organizuar. Në pikën 3 të vendimit shprehja “jo më vonë se 15 (pesëmbëdhjetë) ditë kalendarike”, zëvendësohet me shprehjen “jo më vonë se 40 (dyzetë) ditë kalendarike”.

Me kërkesë të Prokurorit të Përgjithshëm, Këshilli ka miratuar projekt vendimi për fillimin e procedurave të komandimit të një magjistrati prokuror pranë EUROJUST për një periudhë 30 mujore duke kaluar për miratim kriteret për aplikim për këtë pozicion.

Në përfundim të seancës plenare, është hedhur shorti për përzgjedhjen e dy anëtarëve të Këshillit të cilët do të jenë pjesë e Komisionit të Posaçëm për vlerësimin paraprak të kandidatëve për prokurorë në Prokurorinë e Posaçme, ku shorti ka përzgjedhur Besnik Canin dhe Tartar Bazajn.