Organizata Politike ka reaguar përmes një postimi në rrjet, për ndarjen nga jeta të naftëtarit, Artan Voshtina, në spitalin e Fierit. Organizata Politike theksohet se ata që i ‘plasën’ shpirtin Voshtinës, flenë të qetë mbi milionat e vjedhura nga djersa, gjaku, shëndeti i naftëtarëve.
“Me dhimbje dhe revoltë morëm vesh se sot në mbrëmje naftëtari Artan Voshtina ka vdekur në spitalin e Fierit. Artani ka qenë një ndër më aktivët në përpjekjen e naftëtarëve për të vënë në vend të drejtën e mohuar.
Sot Artani ishte në protestë, duke mos iu ndarë kauzës dhe shokëve. Si qindra shokë e shoqe të tij, edhe Artani kishte muaj të tërë pa u paguar, plot vuajtje e stres nga pamundësia për t’iu përgjigjur nevojave të familjes.
Ata që i plasën shpirtin-pronarë e qiramarrës, bankierë e politikanë-sot flenë të qetë mbi milionat e vjedhura nga djersa, gjaku, shëndeti dhe jeta e Artanit dhe qindra Artanëve të tjerë.
Të premtojmë se fitoren do të ta dedikojmë ty!”, zotohen naftëtarët për shokun e tyre”, thuhet në postimin e Organizatës Politike.
