Babai i sulmuesit Erling Haaland, ka zbuluar se djali i tij po ndjek të njëjtën dietë si ajo e Cristiano Ronaldos.
Alf Haaland, gjithashtu tregoi se 19-vjeçari, gjithmonë ka ndjekur nga afër karrierën e yllit portugez dhe dëshiron që të arrijë nivelet e profesionalizmit të tij.
Në një intervistë për “ESPN”, ish-futbollisti ka deklaruar:
“Erling është duke bërë disa sakrifica që të bëhet njëri ndër më të mirët në botë. Është larguar nga shtëpia kur ishte vetëm 16-vjeçar, ku ishte vendosur në Molde dhe mund të them se ai është më profesionist se sa isha unë”.
“Në një takim me Patrice Evra, francezi më ka treguar për dietën që mban Cristiano Ronaldo dhe rutinën e tij. Erling tani po tenton të bëjë të njëjtën gjë për tu përmirësuar sa më shumë dhe të rrisë jetëgjatësinë e tij në botën e futbollit”.
“Kjo dietë natyrisht se po e ndihmon atë që të jetë në formë të lartë dhe ai është i gatshëm që të bëjë edhe tjera sakrifica në mënyrë që të bëhet më i miri”.
Haaland së fundmi ka thyer një rekord, duke u bërë lojtari që arrini të shënojë dhjetë gola në Ligën e Kampionëve, më së shpejti, duke iu nevojitur vetëm shtatë ndeshje.
