Nga Boldnews.al
Ministrja e Shtetit për marrëdhënien me Parlamentin, Elisa Spiropali po jep e merr këto ditë duke u kthyer “fuqishëm” në skakierën politike. Sot ajo reagoi me gjuhë të përflaktë kundër Presidientit të Republikës Ilir Meta. Me fjalë shpuese dhe depërtuese, sikurse është karakteristikë e saj, Spiropali ironizoi deri në palcë qëndrimin e kreut të shtetit për nisjen e protestave në mbrojtje të Kushtetutës.
“Pyetja sot s’është pse Presidentit i ka dalë gjuha jashtë kontrollit dhe s’ka më asnjë kontroll mbi Ilir Metën. Kjo dihet. Pyetja është pse Ilir Meta priti Konferencën e Donatorëve për ta ribërë leckë Presidentin! Keqardhja për Presidentin ka sosur. Ajo për Ilir Metën s’ka të sosur! Zoti e ndihmoftë Ilir Metën se Presidentin s’e ndihmon dot më as Luli! Populli jo e jo. Sa për grushtin e shtetit, ai ka nisur në kokën e Ilirit qysh kur nisi Reforma në Drejtësi dhe do të vazhdojë sa herë që në konsensus me SHBA/BE ne miratojmë ligje që atij i duken grushta.”– shkruan Spiropali.
Me këto rreshta dhe fjali fort të përzgjedhura nga repertori i gjerë letrar, duke u frymëzuar edhe nga “Don Kishoti si personazh i rëndësishëm i letërsisë shqiptare”- gjithnjë sipas Spiropalit, kreut të shtetit i dridhen këmbët nga Reforma në Drejtësi.
Ndërsa duhet lënë pas ky regim i “fortë” i ministresh Elisës, duhet ndalur vërtetë në atë që sot qeveria po e quan Kushtetutë. Është ligji themelar i vendit, por po trajtohet nga pushteti si një brushurë që shkruhet, rishkruhet, hidhet, shkilet dhe interpretohet me qëllim kapjen e çdo pushteti.
Debati që ka ngritur kreu i shtetit Ilir Meta lidhet me nismën e Parlamentit për ti hequr të drejtën Predidentit të Republikës për të pritur anëtarët e rinj të Gjykatës Kushtetuese që të betohen para tij, para se të nisin detyrën.
Tashmë me ligjin që është miratuar nga izmi qeveritar, çdo anëtar i zgjedhur për Gjykatën Kushtetuese mund të betohet me shkrim, çka i hap rrugë identik rastit të mëparshëm të Arta Vurpsit, e cila zgjodhi një noteri të vogël buzë Lanës dhe me 21 mijë lekë të vjetra pagim, deklaroi se “do zbatonte me përkushtim detyrën e anëtares së Gjykatës Kushtetuese”.
Ai rast u bë aq qesharak sa memet në rrjetet sociale ishin mënyra më e mirë për të treguar çmendurinë qeverisëse deri ku mund të arrinte. Përtej zigzageve politike, qëndrimi i kreut të shtetit lidhet me këtë shkelje të rëndë kushtetuese që po serviret nga servilët e pushtetit sikur është konsultuar më parë me ekspertë të BE-së dhe SHBA-së. Ministrja Elisë të paktën kështu e paraqet, ndoshta edhe e beson…
Kushtetuta nuk është shprehje ndjesie dhe vlerësimi, sikundër ka për liderin e Rilindjes Edi Rama, të cilën ministrja Spiropali publikisht e konsideroi se “Skënderbeu ynë”, por është baza e një shteti, ku lojërat e ulëta politike mund të jenë në favor të njërës apo tjetrës palë, por pasojat janë gjithnjë në kurriz të qytetarëve.
Duke kapur çdo pushtet të mundshëm, ekskutiv, legjislativ, gjyqësor dhe çdo instancë tjetër Ramës i kishte mbetur vetëm një “Presidenca’ pa e kapur dhe në pamundësi joshje dhe shantazhi, sot po përdor formën për të hequr edhe ato pak kompetenca që ka kreu i shtetit.
