IKMT njoftoi të enjten e kaluar se sot në mëngjes do të niste aksionin për shembjen e ndërtesa te “Unaza e Re”, paralajmërim që ka ngritur në këmbë banorët dhe kanë monitoruar situatën përgjatë gjithë natës.
E ndërsa mjetet e rënda të IKMT-së nuk kanë shkuar, ashtu sikundër kanë ndodhur në aksionet e fundit në zonë, banorët janë shprehur se do të qëndrojnë nën monitorim të situatës, pasi sikundër shprehen ato “ata vijnë kur s’e presim”.
Banorët janë organizuar në një protestë, ndërsa ish-deputeti demokrat, Klevis Balliu, i cili iu bashkua në mëngjes, ka ripërmendur zotimet e Partisë Demokratike, se banorët do të kompensohen 100% sapo PD të vijë në pushtet.
Ai paralajmëroi mazhorancën dhe institucionet që kanë nën kompetencë këtë projekt, se do të përballen me përgjegjësitë ligjore për dhunën dhe terrorin që kanë ushtruar mbi banorët, përveç akuzave të tjera për afera korruptive.
“Banorët dua ti siguroj se PD nuk tërhiqet në asnjë pikë në atë kontratë të nënshkruar me banorët e Unazës së Re të cilët janë përballur çdo ditë deri me dhunën e policisë dhe të shtetit. që kanë marrë zvarrë zonjat dhe burrat e tyre në mënyrën me të shëmtuar.
Nuk do të ndalojmë së kërkuari drejtësi për banorët e Unazës. Ata që do të vijnë tek këta që kanë paguar taksa për 30 vite, dua t’ju them se do të mbahet përgjegjësi, për OFL që kanë shkuar kallëzime të pavërteta, deri tek Drejtorët e ARRSH-së, kryeministrisë, ministrive. Do të vihen para drejtësisë për krim shtetëror.
Nuk bëhet fjalë vetëm për korrupsion, por për dhunë ndaj banorëve. Qytetarët të jenë të qetë, këto fjalë do ti themi edhe kur të jemi në pushtet dhe do të japim ndaj tyre atë që meritojnë”, tha Balliu.
