Kështjella e mbrojtjes së Kushtetutës dhe demokracisë, e cilësoi Presidenti Ilir Meta institucionin e Presidencës, ndërsa paralajmëroi depozitimin e një tjetër shkrese për thellimin e hetimit të kreut të KED-së, Ardian Dvorani.
Meta tha se do të depozitohen prova të reja për veprimtarinë kriminale të Ardian Dvoranit, duke kërkuar një thellim të hetimeve ndaj tij, pas depozitimit në prokurori të kallëzimit penal, pak javë më parë.
“Dvorani ka shtrembëruar faktet dhe ka abuzuar me detyrën, duke mashtruar ndërkombëtarët, në bashkëpunim me Kuvendin”, tha Meta, ndërsa kërkoi ndalimin e veprimtarisë ndaj kryetarit të KED-së.
Meta tha se Dvorani i ka rrëmbyer kompetencat Presidentit të Republikës, ndërsa ka përcaktuar anëtarin e Gjykatës Kushtetuese pa mbledhur KED-në.
Ai akuzoi Dvoranin për një skenar për kapjen e Gjykatës Kushtetuese, duke penguar ngritjen e kësaj gjykate.
“Dua t’ju informoj mbi fakte të reja për fakte kriminale për emërimet në drejtësi nga Ardian Dvorani. Sot do të përgatitet dhe dorëzohet një shtesë në kallëzimin penal ndaj tij të nisur në 2019.
Jo vetëm për veprat penale ndaj tij, por edhe pse Ardian Dvoranit i duhet ndaluar menjëherë ushtrimi i detyrës së tij kriminale dhe tentativa për kapjen e Gjykatës Kushtetuese.
I duhet ndaluar vijimi i procesit të veprimtarisë kriminale për emërimet në vendet vakante në Gjykatën Kushtetuese.
Dvorani ka keqinformuar dhe fshehur ushtrimin e kompetencave të tij në emërimin e anëtarit të Kushtetueses që i takonte presidentit. Pa patur kompetencë ligjore, e aq më pak në përputhje me Kushtetutën, ka bërë zgjedhjen e një anëtari të Kushtetueses.
Pa asnjë kompetencë kushtetuese dhe ligjore dhe duke manipuluar opinionin ndërkombëtar ka shtrembëruar ligjet duke emëruar anëtarin e kësaj gjykate.
Duhet të përgjigjet pse nuk thirri KED për t’iu përgjigjur shkresës që i ka mbërritur nga Kuvendi. Me kë bashkëpunoi që të sillte brenda pak orësh një përgjigje me shkelje të rëndë të ligjit”, tha Meta. (Vijon)
