Presidenti Ilir Meta tha se ligji anti-KÇK është anti-Kushtetues dhe si i tillë do të dështojë.
“KÇK është zhurmë për të spostuar vëmendjente përpjekja për të finalizuar kapjen e shtetit dhe për të instaluar grushtin e shtetit. Ky është vetëm një grusht shteti. Ti me ca letra bën një grusht shteti, s’ka nevojë për tanke, për gaz, por për ca letra dhe mbyllet çdo gjë me një dorë, sovraniteti i Shqipërisë është vetëm në një dorë, të gjitha të drejtat e shqiptarëve janë në një dorë, ka vetëm maliq, nuk ka as ligj dhe as kushtetutë“, tha Presidenti.
Në vijim ai iu referua një sondazhi, duke u shprehur “Presidenti është shprehur për ligjin e krye-KÇK-së. Ja ku e keni sondazhin në Facebook, 85% nuk e besojnë, vetëm 15% e besojnë. Ligji është anti-kushtetues dhe do të dështojë. Kjo është përpjekja për të çuar në Kushtetuese militantët e partisë. Ky është ligj është për Dvoranin dhe ndonjë tjetër si ai”, u shpreh Meta.
I pyetur sepse nuk jep dorëheqjen përballë një situate të tillë, ku institucioni i Presidencës mund të shërbejë si fasadë për demokracinë, Meta tha se do të respektojë betimin që ka bërë me dorën mbi Kushtetutë.
“Zero mundësi që Presidenti i Republikës të tërhiqet nga detyra dhe misioni i tij për mbrojtjen e Kushtetutës dhe shtetin e së drejtës, pavarësisht avancimit të grushtit të shtetit”, tha Meta.
Në këtë kuadër, Presidenti tha se do të qëndrojë në detyrë deri më 24 korrik 2022.
Meta i ka kërkuar ndjesë Komisionit të Venecias, i cili sipas tij, u keqpërdor nga mazhoranca në funksion të realizimit final të një grushti shteti.
“Si president i Republikës së Shqipërisë, i kërkoj ndjesë Komisiont të Venecias që u këqpërdor nga mazhoranca në funksion të realizimit të grushtit të shtetit.
Shqipëria edhe pse po përjeton gjendjen më të rëndë të kapjes së shtetit nuk do të pranojë instalimin e grushtit të shtetit.
Do të marr pjesë në seancën plenare në Komisionin e Venecias ku do të njoh të gjithë të pranishmit me fakte edhe më të rënda sesa këto të përpjekjes për të realizuar një grusht shteti në këtë vend”, u shpreh Meta.
Ai sqaroi se ka qenë kundër ardhjes së Venecias lidhur me çështjen në fjalë, për faktin se ligjet që përcaktojnë procedurën e zgjedhjes së anëtarëve të Gjykatës Kushtetuese e ka shkruar vetë Venecia.
