Kremlini akuza NATO-s dhe BE për nxitje të tensioneve/ Rama e Lavrov me të njëjtin qëndrim?!

Ministri i Jashtëm rus, Sergei Lavrov ka akuzuar NATO-n dhe Evropën se po nxit tensione në kontinent, teksa i ka bërë thirrje liderëve botërorë që të “heqin dorë nga kërcënimi fantom rus”.

Lavrov i bëri këto komente në Konferencën për Siguri në Mynih, ku nuk përmendi fare krizën në Ukrainë, ku për pothuajse gjashtë vjet po zhvillohen luftime ndërmjet forcave ukrainase dhe luftëtarëve të mbështetur nga Rusia.

Lufta në lindje të Ukrainës dhe aneksimi i Krimesë nga Rusia, kanë bërë që shtetet perëndimore të vendosi sanksione ndaj Moskës. Po ashtu, Rusia është përjashtuar nga Këshilli i Evropës, si pasojë e aneksimit të gadishullit ukrainas të Krimesë.

Deklaratat e Lavrov pothuajse janë në të njëjtat gjatësi vale me ato që shprehu Kryeministri Edi Rama, në Konferencën e Sigurisë në Mynih, ku foli me cilësinë e kryetarit të Presidencës së OSBE.

“Nuk ka të bëjë vetëm me Ukrainë, Gjeorgjinë, por me civilizimin tonë. Dhe Rusia, për aq kohë sa do të jetojë me frikën e të qenurit rrethuar nuk do të ketë një zgjidhje përfundimtare. Për aq kohë sa do të jetojë me frikën e rrethuar nga NATO dhe BE, gjërat nuk do të përmirësohen. Zelensky nuk ka kohë, ka vetëm 4 vjet. Palët e tjera kanë shumë kohë. 16 vjet më parë u mblodhët duke qenë se ishit të shqetësuar për Ukrainën, por 16 vjet më vonë kemi një luftë atje”, u shpreh Rama.

LEXO EDHE  COVID/ Mjekja pediatre: S'ka siguri 100% që fëmijët e kalojnë më lehtë

Kjo deklaratë e Ramës u interpretua si një justifikim që ai i bëri veprimeve të Rusisë, duke hequr përgjegjësinë e Kremlinit. Rama pritet që së shpejti të ketë një takim me Presidentin rus, Vladimir Putin.

Ndërkohë, Lavrov sugjeroi se NATO duhet të fajësohet për tensionet me Rusinë, përfshirë këtu rritjen e prezencës viteve të fundit të ushtrive perëndimore në shtetet e Baltikut dhe Poloni.

“Kriza e besimit veçanërisht ndihet në çështjet evropiane. Nxitja e tensioneve, përparimi i infrastrukturës ushtarake të NATO-s në Lindje, ushtrimet ushtarake në një shkallë të pashembullt në afërsi të kufijve të Rusisë, rritja e buxheteve të mbrojtjes përtej çdo mase, të gjitha këto gjenerojnë pasiguri”, tha Lavrov.