Personazhe të njohur kanë ironizuar deklaratat e ambasadorit të BE-së në vendin tonë, Luigi Soreca. Ky i fundit reagoi lidhur me raportimet për ekzistencën e një videoje intime me një zëvendësministre, ndërsa nuk flet për akuzat që iu bënë nga Kuvendi i Shqipërisë si “i kapur nga KÇK”.
Soreca, në një emision televiziv një ditë më parë u shpreh lidhur me lajmet e përhapura për ekzistencën e një video intime me një zv.ministre të qeverise Rama, duke i quajtur gënjeshtra.
Një ditë më vonë, zëdhënësi i Presidentit Ilir Meta, Tedi Blushi deklaroi se kreu i shtetit do ti kërkojë institucioneve ligjzbatuese të nisin hetimet “për zbardhjen pa asnjë vonesë të autorëve dhe urdhëruesit të këtij shantazhi të dënueshëm ndaj dy autoriteteve”.
Reagimin e bëri përmes një statusi në rrjetet sociale, ku komentet ironike të personazheve të njohura nuk kanë munguar. “Dua dhe unë zoti President, të hyj te ky grup pune për investigimin, nxjerrjes se vërtetës dhe ndëshkimin e autoreve. Situata e kërkon dhe hyrjen e SPAK dhe shërbimeve inteligjente ndërkombëtare në veprim”, komenton Ylli Dylgjeri. Ndërsa Agim Xhafka shkruan: “Fraza ‘goditjen e pastërtisë së figurës së tij’, më hodhi në tokë.
Kujtojmë se nga foltorja e Kuvendit, deputeti Lefter Maliqi e akuzoi ambasadorin si i lidhur me krimin dhe “i kapur nga KÇK”. Lidhur me këtë akuzë mjaft serioze për figurën e një diplomati në rangun e tij, nuk ka pasur asnjë reagim nga ambasadori. Natyrshëm, lind pyetja: Pse ambasadorit Soreca i ‘dhemb’ akuza për skandal seksual dhe jo akuza e bërë nga Kuvendi, se është i lidhur me krimin dhe i kapur nga KÇK-ja?
