Ish-deputeti Lefter Maliqi ka reaguar sërish ndaj kryebashkiakut të Kuçovës, Kreshnik Hajdari, duke deklaruar se ky i fundit ndodhet në panik dhe frikë pas vendimit të Komisionit të Ankimimeve dhe Sanksioneve (KAS), i cili urdhëroi Celibashin të vendosë për shkarkimin e tij.
Në një postim në rrjete sociale, Maliqi shkruan se Hajdari i ka dërguar një letër dje Komisionit Qendror të Zgjedhjeve që të mos marrë vendim, pasi e ka ankimuar vendimin e KAS-it në Gjykatën Administrative.
Sipas Maliqit, kjo është një taktikë për të fituar kohë, pasi sipas tij, nuk është më kompetencë e Gjykatës Administrative dhe kjo e fundit nuk e pengon KQZ-në të marrë vendimin për shkarkimin e tij.
Maliqi thotë se KQZ duhet të mblidhet urgjentisht për vendim dhe më pas është KAS-i që vendos përfundimisht.
Reagimi i Maliqit:
Hajdari, në karrigen e krimit elektoral të Bashkisë së grabitur të Kuçovës, i frikësuar dhe në panik pas vendimit unanim 5:0 të KAS-it, i cili i urdhëroi KQZ-së të marrë menjëherë vendimin për pavlefshmërinë e mandatit dhe shkarkimin e tij, në bazë edhe të vendimit të Gjykatës së Lartë.
Dje, Hajdari i dërgoi shkresë KQZ-së që të mos marrë vendim, pasi na paska ankimuar vendimin e KAS-it në Gjykatën Administrative. Thjesht kërkon të fitojë kohë, pasi nuk është më kompetencë e Gjykatës Administrative dhe kjo e fundit nuk e pengon KQZ-në të marrë vendimin për shkarkimin e tij. KQZ duhet të mblidhet urgjentisht për vendim dhe më pas është KAS-i që vendos përfundimisht.
Pse ka frikë? Pse është në panik? Pse bën ankime? Pse kërkon të shtyjë vendimin? Kjo tregon se edhe vetë e di që jo vetëm duhet të ishte shkarkuar, por edhe të përballej me pasojat ligjore.
Hajdari ka kaluar këto 3 vite duke paguar avokatë të shtrenjtë, duke lobuar me oligarkë e politikanë, me taksat e qytetarëve, në KQZ, Kolegjin Zgjedhor, SPAK, Gjykatën e Posaçme kundër Krimit dhe Korrupsionit, në Gjykatën e Beratit, Gjykatën Administrative të Tiranës, Gjykatën e Lartë, përsëri në KQZ dhe tani sërish në Gjykatën Administrative, KQZ dhe KAS derisa të merret vendimi përfundimtar.
Të dashur qytetarë të Kuçovës, e shihni që mandati i vjedhur e i grabitur po i del nga hundët. Nuk po e gëzon, por po përpiqet ta shtyjë me lobime në drejtësi dhe në institucionet e kapura të këtij shteti të kalbur.
Ju garantoj se fundin do ta ketë të hidhur. Pas shkarkimit apo largimit nga detyra e kryetarit të Bashkisë, jo vetëm që do ta braktisin të gjithë, por nuk do ta mbrojë më askush. Të gjitha letrat për abuzimet në Bashkinë e Kuçovës do të përfundojnë në SPAK dhe ndëshkimin e ka të pashmangshëm.
Ftoj KQZ-në, së cilës i kam bërë shkresë urgjente, të mblidhet dhe të japë vendimin për shkarkimin e Hajdarit, që sot është në panik dhe i frikësuar.
