Yuri Kim, ambasadorja e SHBA në Tiranë, po zhvillon një takim në godinën e Këshillit të Ministrave me Kryeministrin, Edi Rama. Ky është takimi i dytë mes diplomates amerikane dhe Kreut të Qeverisë, që nga momenti kur Kim ka ardhur në Tiranë në detyrën e Ambasadores së SHBA.
Takimi vjen në një kohë kur Qeveria ka nisur një operacion kundër “KÇK”, sikundër e ka “pagëzuar” Kryeministri Rama, si dhe një ditë pasi Kuvendi miratoi një ndryshim në një nga ligjet e reformës në drejtësi, duke i marrë kompetencën e betimit të gjyqtarëve, Presidentit të Republikës.
Gjithashtu takimi realizohet në kohën kur mes pozitës dhe opozitës ka nisur puna për reformën zgjedhore, me asistencën edhe të ekspertëve të ODIHR.
Ndërkohë, dy ditë më parë Ambasada e SHBA deklaroi se klima aktuale e biznesit po pengonte investimet e huaja dhe kërkoi nga qeveria shqiptare t’i shqyrtonte seriozisht këto sfida.
“Shpresojmë që qeveria e Shqipërisë të shqyrtojë seriozisht sfidat në mjedisin aktual dhe të zbatojë ndryshime të prekshme, për të tërhequr investimet e huaja shumë të nevojshme,” thuhej në deklaratë.
Nuk dihet se çfarë po diskutohet në takimin mes Yuri Kim dhe Ramës, por në bisedën e parë që patën, sikundër është njoftuar zyrtarisht janë diskutuar prioritetet e përbashkëta mes dy vendeve.
Ndërkohë, Ambasada e SHBA në Tiranë njoftoi “Ambasadorja e Shteteve të Bashkuara Yuri Kim pati mundësinë të përvijojë prioritetet e Shteteve të Bashkuara në Shqipëri: të ndihmojë Shqipërinë për tu bërë një aleate më e aftë në NATO dhe një bastion më i fortë sigurie; mbështetje për zhvillimin demokratik dhe sigurimin e zbatimit të duhur të reformave në drejtësi; dhe rritjen e mundësive të biznesit për shqiptarët dhe amerikanët. Ajo falenderoi Kryeministrin për përpjekjet e jashtëzakonshme të Shqipërisë në çuarjen përpara të prioriteteve tona të përbashkëta. SHBA qëndron krah Shqipërisë”.
