Kryeministri Edi Rama do të jetë i pranishëm mbrëmjen e sotme në emisionin “Opinion” ku pritet të debatojë lidhur me anti-KÇK.
Përmes një postimi në rrjet, Rama shkruan ” sonte në “Opinion” mbi operacionet ndaj pasurive të vrasësve, trafikantëve të drogës, shfrytëzuesve të vajzave dhe ligjin e aprovuar për pezullimin nga detyra dhe hetimin e figurës e të pasurive të organizatës kriminale “Kao Ça Tkapësh” (KÇK) në sistemin gjyqësor”.
Në vijim Rama shkruan “kush do të dijë cilët kap Ligji Special i pasurive kriminale; ku ndryshon thelbësisht pasuria e tyre nga pasuria e njerëzve të zakonshëm apo sipërmarrësve të vegjël a të mëdhenj, që kanë fshehur të ardhura nga puna e tyre gjatë tre dekadave të fundit; pse Operacioni Forca e Ligjit u shërben këtyre të fundit dhe mbi të gjitha Shqipërisë që duam; pse OFL nuk merret me “Surrelin”, “Gjirin e Lalëzit” apo “Parlamentin”; pse ky operacion nuk nisi më parë gjatë 6 viteve e gjysëm të mandatit tonë qeverisës e me radhë, përgjigjet e mia për të gjitha kundërshtitë e shfaqura ndaj këtij përshkallëzimi ekstrem të luftës së shtetit me krimin, le të më ndjekë sonte”.
Prej disa ditësh debatohet mbi operacionin anti-KÇK që bazohet në një akt-normativ, i cili ka hyrë në fuqi. Pothuajse çdo ditë OFL raporton mbi formularët e vetëdeklarimit që u dërgohen personave të caktuar, që kanë pasur probleme me ligjin apo kanë qenë të dënuar, të cilëve u kërkohet të deklarojnë burimin e pasurive që zotërojnë. Një nga nenet e aktit-normativ është ai mbi përgjimet, që i jep policisë të drejtë të përgjojë pa pasur nevojë për lejen e prokurorisë apo vendim gjykate.
Akti-normativ është pasuar nga një show në terren i Njësisë Speciale OFL, nga meme ironizuese, por edhe kundërshti lidhur me kushtetueshmërinë e tij. Por Kryeministri Rama ka preferuar që kundërshtarët e aktit normativ t’i cilësojë si të paguar nga krimi, pavarësisht se mund të jenë emra të njohur në fushën e medias, shoqërisë civile, drejtësisë apo konstitucionalistë.
