Drejtoria Vendore e Policisë Tiranë, në bashkëpunim me prokurorinë, nisi hetimin pasuror ndaj shtetasit Vladimir Gjuta. Lajmi konfirmohet nga burime zyrtare nga Policia e Tiranës. 40-vjecari, u arrestuar një ditë më parë nga Komisariati i Policisë Nr. 3, pasi u kap me armë zjarri me vete dhe një shumë të madhe parash (rreth 200 milion Lekë), pranë selisë së Partisë Socialiste.
Në cilësinë e provës materiale, policia sekuestroi një armë zjarri pistoletë, municion luftarak dhe shuma parash. Gjithashtu sekuestroi edhe një automjet të blinduar, që sipas burimeve zyrtare, e kishte në përdorim 40-vjeçari.
Ndalimi
“Shërbimet e Komisariatit të Policisë Nr.3, në rrugën ‘Çamëria’, rreth orës 08:45, bënë kapjen dhe arrestimin në flagrancë të shtetasit V. Gj, 40 vjeç, banues në Tiranë, i dënuar më parë.
Në momentin e kapjes nga Patrullat e Përgjithshme të Komisariatit të Policisë Nr. 3, këtij shtetasi iu gjetën me vete një armë zjarri pistoletë me municon luftarak, një dorezë grushti metalike, si dhe një sasi e madhe parash në valutë dhe Lekë shqiptare. Shërbimet e Policisë, në bashkëpunim me Sektorin për Krimin Ekonomik e Financiar dhe atë të Krimeve ndaj Jetës dhe Personit në DVP Tiranë, kanë ushtruar kontroll në banesën e këtij shtetasi, ku kanë gjetur dhe sekuestruar edhe shuma të tjera parash.
Në total iu gjetën dhe sekuestruan në cilësinë e provës materiale: 121.100 euro, 27.500 dollarë amerikanë, 22.970 paund anglez dhe 664.500 lekë të reja.
Po gjatë kontrollit të banesës së Gjutës, shërbimet e Policisë gjetën dhe sekuestruan edhe një mjet të blinduar autoveturë ‘Audi A8’, me të cilën ai qarkullonte”, thanë burime zyrtare nga Policia e Tiranës.
Akuzat
Ndaj, Vladimir Gjutës, janë ngritur tre akuza.
“Në vijim të veprimeve, nga strukturat e Drejtorisë Vendore të Policisë Tiranë, në bashkëpunim me Prokurorinë e Rrethit Gjyqësor Tiranë, ka nisur hetimi pasuror për shtetasin V. Gj. Në përfundim të veprimeve, materialet iu referuan prokurorisë, për veprat penale ‘Armëmbajtja pa leje’, ‘Prodhimi, mbajtja, blerja apo shitja pa leje e armëve të ftohta’ dhe ‘Pastrimi i produkteve të veprës penale ose veprimtarisë kriminale’”, njoftoi Policia.
Precedentët
Emri i Vladimir Gjutës nuk është i panjohur për ngjarjet e kronikës së zezë. Çështja më e bujshme ku është akuzuar si i implikuar ka qenë ajo e vitit 2015, kur u arrestua me akuzën për vendosjen e tritolit në farmacinë e babait të ministrit të Brendshëm Saimir Tahiri. Ndalimi i tij u nga forcat RENEA dhe reparti i Krimeve të Rënda, në hyrje të tunelit të Kalimashit.
Në momentin e arrestimit, Gjuta ishte duke udhëtuar drejt qytetit të Kukësit me një automjet tip “Opel” me targa Kosove, si dhe ndodhej nën shoqërinë e një shtetasi nga Kosova. Gjuta akuzohej edhe për kërcënime me SMS ndaj ish-ministrit të Brendshëm Saimir Tahirit.
Një vit më vonë, në vitin 2016, Vladimir Gjuta fitoi lirinë. Lirimi erdhi pas vendimit nga Prokuroria e Krimeve të Rënda, e cila pushoi procedimin penal ndaj tij dhe shtetasit Baftjar Bruka, të dyshuar për veprat penale të “Veprave me qëllime terroriste”, “Krijimit të grupit të strukturuar kriminal” dhe “Kryerjes së veprave penale nga grupi i strukturuar kriminal.
/BN/
