Kap Ça të Kapësh ose shkurt KÇK është nga shprehjet më të përdorshme të Kryeministrit Edi Rama në muajt e fundit. Madje, Qeveria e drejtuar prej tij, miratoi edhe një akt-normativ që ka hyrë në fuqi dhe po zbatohet kundër KÇK-së.
Kryeministri kur fliste për KÇK kishte parasysh gjyqtarë dhe prokurorë, që sipas tij e dinin që nuk kalonin Vetting.
Por në aktin-normativ nuk flitet për ta, ndërsa operacioni po shigjeton personazhe që kanë pasur probleme me drejtësinë, janë dënuar për vepra penale të rënda.
Në terren, policia e angazhuar në kuadër në kuadër të asaj që quhet OFL po jep show, ndërsa dita-ditës raportohen emra të personazheve që duhet të vetë-deklarojnë pasuritë.
Po kështu, policia raportohet se ka bllokuar për verifikim disa automjete luksoze, duke e kthyer të gjithë operacionin e bujshëm në qesharak, po të kihen parasysh numri i lartë i policëve me dhe pa maska të angazhuar në terren.
Situata ka krijuar debate, për vetë faktin se akti-normativ bie ndesh me Kushtetutën, pasi policisë i janë dhënë kompetenca që më parë i kishte prokuroria dhe gjykata.
Po kështu disa nga diplomatët e akredituar në Tiranë kanë vënë theksin te zbatimi i ligjit, duke kërkuar që SPAK të vlerësojë rastet që ia paraqet OFL dhe më pas të jetë Gjykata që do të shprehet.
Disa nga pasuritë e deklaruara si të sekuestruara nga OFL rezultojnë se i janë nënshtruar më parë hetimeve dhe ka vendime gjyqësore, çka ndërlikon situatën në aspektin e veprimit nga SPAK dhe Gjykata Speciale.
E përballë problematikave, në rrjet ka plasur gallata, por jo vetëm.
Një dyqan në Tiranë, në një nga zonat më të frekuentuara, ka zgjedhur që të reklamojë uljen e çmimeve duke përdorur pikërisht KÇK.
“Tani KÇK edhe për të kapur brekë! Vraponi!”, shkruan në rrjet gazetari Ylli Dylgjeri, duke publikuar edhe foton e mëposhtme, që është bërë virale në rrjetet sociale.
