Avokati Ledio Braho, shprehet se në thelb, OFL po dëmton punën e SPAK dhe po dublon Byronë e Hetimit, dhe kjo bëhet jo pa qëllim.
I ftuar në Syri Tv, Braho deklaroi se nëse kjo maxhorancë do kishte vullnetin për të hetuar pasuritë e personave me të shkuar kriminale, e ka shumë të thjeshtë, çdo transaksion kalon nëpërmjet asaj që quhet drejtoria e pastrimit të parave.
Më tej, avokati Braho u shpreh se SPAK nuk mund të gjykojë çështje që janë gjykuar njëherë nga Gjykata. OFL po ngarkon SPAK-un, që në vend që të merret me dosjet e bujshme, merret me dosje që janë gjykuar. Deri në fund të vitit 2020 nuk do të shikoni asnjë produkt të SPAK për këto dosje.
“Mosveprimi është i institucioneve shtetërore. Nëse këto dosje nuk shkojnë në Prokurori dhe Gjykata nuk do të ketë vlerë. Ajo që realisht po bën OFL është që po mbingarkon SPAK-un. SPAK-u nuk i ka kapacitetet ti hetojë këto pasuri.
Kjo thjesht do bëjë atë që do ta mbingarkojë deri në fund të vitit SPAK-un. Plus që nëse këto dosje do të ankimohen dhe mund të shkohen edhe në gjykata më supreme, shteti do të duhet ti paguajë këtyre personave edhe një dëmshpërblim për fitimin e munguar gjatë kohës që aktivitetet kanë qenë të pezulluara.
Ironia në këtë akt normativ që quhet OFL është që ditën e parë Ministri i Brenshëm i thirrur në interpelancë thoshte se Shqipëria ka bërë hapa para me krimin. Ndërkohë që po të njëjtën ditë nisi operacioni OFL. Pra qeveria nuk është koherente për aktet që sjell.”-shprehet Braho.
Ndër të tjera Braho ka folur edhe për dublimin që OFL po i bën Byrosë Kombëtare të Hetimit.
‘Ka edhe një aspekt tjetër që OFL po dublon BKH-në. Dhe kjo shpëton zyrtarët e lartë. Dhe të besosh që sot ka krim pa ndihmën e pushtetit, është naivitet. Në momentin që sekuestrohen pasuritë e politikanëve të lartë e bën edhe më të besueshëm nismën e ndërmarrë’-tha Braho.
