Ardi Veliu ka firmosur urdhrat për sekuestrimin në kushtet e emergjencës të tre makinave të blinduara.
Burime zyrtare nga Policia, thanë se “në vijim të Operacionit Forca e Ligjit, në zbatim të ligjit special për masat pasurore ndaj individëve të dënuar apo akuzuar për krim të organizuar, Drejtori i Përgjithshëm i Policisë së Shtetit, në bazë të nenit 19 të Aktit Normativ ‘Anti-KÇK’, nxorri urdhrat e sekuestrimit në kushtet e emergjencës për disa automjete të blinduara, të cilat u sekuestruan gjatë operacionit”.
Automjetet e sekuestruara janë në pronësi të shtetasve:
Saimir Taullau, banues në Lushnjë, i dënuar për veprën penale “Prodhimi dhe shitja e narkotikëve”;
Dashamir Gjoka, banues në Durrës, i dënuar në Itali për trafik të qenieve njerëzore;
Durim Bami, banues në Krujë, i dënuar për veprën penale “Vjedhja me armë”;
Neni 19 të i Aktit Normativ parashikon sekuestrimin e pasurisë nga Policia e Shtetit në rastet e emergjencës. “Në rastet e nevojës dhe të urgjencës kur ka informacione apo dyshime të arsyeshme, të bazuara në elemente të faktit se pasuritë e subjekteve të parashikuara në nenin 16 të këtij akti, pavarësisht nëse zotërohen apo janë në përdorim apo posedim në mënyrë të drejtpërdrejtë ose të tërthortë prej tyre, janë siguruar në mënyrë të pajustifikuar në raport me nivelin e të ardhurave apo fitimeve nga veprimtari të ligjshme, të deklaruara sipas përcaktimeve të legjislacionit në fuqi, si dhe kur pasuria ka rrezik të tjetërsohet, të asgjësohet, të dëmtohet, të transferohet, të transportohet apo në çdo rast tjetër që dyshohet se mund të rrezikohet zbatimi i një mase të mundshme sekuestroje, Drejtori i Përgjithshëm i Policisë së Shtetit urdhëron vendosjen e masës së sekuestros”.
