Kosovë/ Pacientja dyshohej se u prek nga koronavirusi, del rezultati i analizave

Është publikuar rezultati i analizave të pacientes e cila u shtrua në infektivin e Kosovës, pasi dyshohej se ishte prekur nga koronavirusi. QKUK ka treguar se, pas analizave, pacientja ka rezultuar e pa prekur nga koronavirusi.

Lajmin e ka bërë të ditur mjeku Naser Ramadani, nga Instituti Kombëtar i Shëndetit Publik të Kosovës. Edhe Lendita Berisha, drejtoreshë e Klinikes Infektive, e ka konfirmuar lajmin.

Sipas mjekëve të QKUK-së, pacientja është shtetase e huaj, e cila punon në Kosovë. Mjekët kanë bërë të ditur se pacientja, pasi i është shfaqur një kollë, ka shkuar në spital për t’u kontrolluar.

Ajo kishte qëndruar në një qendër për ski jashtë Kosovës, ku ka mësuar se disa persona ishin dyshuar se janë prekur nga koronavirusi.

“Bëhet fjalë për një shtetase të huaj në Kosovë, që ka qëndruar në një qendër skijimi me pesë të dyshuar të tjerë që dyshohet se janë infektuar me koronavirus”, ka thënë ministri i Shëndetësisë, Arben Vitia.

Ndërkohë, numri i viktimave në Kinë nga shpërthimi i koronavirusit është rritur në 723, njoftoi Komisioni Kombëtar Shëndetësor i vendit (NHC).

LEXO EDHE  VIDEO/ Ndodh te Infektivi, barrela me të moshuarën sipër zë poshtë infermierin

Autoritetet njoftuan se deri më tani janë konfirmuar 34 546 raste, ndërsa 86 persona kanë vdekur dhe më shumë se 3000 raste të reja janë zbuluar gjatë 24-orëve të fundit. Numri i personave nën vëzhgim mjekësor është rritur në 185, 555, ndërsa numri i atyre që dyshohet se janë të infektuar është 27, 657.

Gjithashtu numri i personave të infektuar jashtë territorit kryesor të Kinës ka arritur në 26 në Hong Kong dhe 10 në Makau. Thuhet se virusi është transmetuar te njerëzit nga kafshët, veçanërisht nga lakuriqët e natës.

Përveç se në Kinë, virusi është përhapur në më shumë se 20 vende, përfshirë SHBA-në, Britaninë e Madhe, Singaporin, Francën, Rusinë, Spanjën dhe Indinë.

Shumë vende kanë evakuuar qytetarët e tyre nga Wuhan-i, epiqendra e virusit dhe zona të tjera të prekura të Kinës. Organizata Botërore e Shëndetësisë (OBSH) ka shpallur epideminë emergjencë ndërkombëtare.

 

LEXO EDHE: 

Mediat kosovare: Një paciente dyshohet se është infektuar me koronavirus

Mjekët në Kosovë: Analizat do të tregojnë nëse pacientja është e prekur nga koronavirusi