Një banesë në periferi të kryeqytetit ka rënë prej e grabitjes paraditen e djeshme.
Autori, për të cilin policia njoftoi këtë të premte se është vënë në pranga, ka marrë bizhuteri dhe para.
Aksioni
Burime zyrtare nga policia bënë me dije se specialistët për Hetimin e Krimit në Komisariatin e Policisë Nr. 5, pas njoftimit të marrë se në Bathore, në rrugën “Bërzhitë”, rreth orës 10:50 të paradites së datës 06.02.2020, në banesën e shtetasit H.H., kishte hyrë një person i maskuar dhe nën kërcënimin e thikës kishte vjedhur lekë dhe disa bizhuteri, kanë organizuar punën për zbardhjen e ngjarjes, identifikimin dhe kapjen e autorit.
Si rezultat i informacioneve të marra në rrugë operative dhe veprimeve proaktive u bë e mundur që brenda pak orëve të identifikohej personi i dyshuar si autor i kësaj ngjarjeje.
Në këtë kuadër u organizua operacioni policor i koduar “Bërzhita”, duke u finalizuar me kapjen dhe arrestimin në flagrancë të shtetasit: A.M., 25 vjeç, banues në lagjen nr. 4 Bathore, Tiranë, i dënuar më parë për vjedhje.
Gjatë operacionit, shërbimet e Komisariatit të Policisë Nr. 5 bënë të mundur gjetjen dhe sekuestrimin në cilësinë e provës materiale të sendeve të vjedhura nga autori në banesën e shtetasit H.H..
“Materialet i kalojnë Prokurorisë së Rrethit, në ngarkim të shtetasit A.M., për veprën penale ‘Vjedhja me dhunë’, për të cilën parashikohet dënimi deri në 15 vjet burgim”, njoftoi policia.
