Ish-ministri i Brendshëm, Fatmir Xhafaj ka kritikuar “anti-KÇK”-në e trumbetuar me forcë nga kryeministri Edi Rama.
“Politika dhe Rama personalisht ka udhëhequr një debat të fortë, duke u treguar i pakujdesshëm sepse gjyqtarët dhe prokurorët kanë tashmë qeveritë e tyre. Flet më shumë Rama se KLGJ dhe KLP sidomos në rastin e gjyqtares së Krujës që liroi Indrit Doklen. Është e papranueshme që KLGJ s’ka reaguar ende për këtë rast”, është shprehur Xhafaj këtë të enjte në komisionin e ligjeve.
Boldnews ka raportuar më herët se “Anti-KÇK” e shndërron në subjekt të verifikimit edhe Fatmir Xhafajn, vëllain e Geronit, duke qenë se parashikon që do të kalojë në filtrin e Policisë pasuria e të dënuarve për përfshirje në krim të organizuar, si edhe familjarëve të tyre, përfshirë vëllezërit. Agron (Geron) Xhafaj është duke vuajtur aktualisht dënimin me 7 vjet e 6 muaj, të dhënë nga drejtësia italiane, për pjesëmarrje në organizatë kriminale të përfshirë në trafik narkotikësh, me vendimin nr. 2232/212, dt.25.09.2012 të Gjykatës së Kasacionit të Italisë.
Në bazë të të dhënave të vetëdeklaruara nga Fatmir Xhafaj në ILDKPKI, deri në fund të vitit 2018, rezulton se ai dhe familja e tij kanë në pronësi 4 apartamente, tre dyqane, një Benz me vlerë 54 mijë euro, si edhe mijëra euro e miliona lekë në llogari bankare.
E teksa shprehet kundër “anti-KÇK”-së, lind dyshimi: A ka frikë Xhafaj se mos i sekuestrojnë pasurinë?
Pasuria gjigande e Fatmir Xhafaj. A do të bllokojë KÇK e Ramës pronat e vëllait të Geronit?
