“Porosia erdhi nga lart.” Kështu deklaron kryedemokrati Lulzim Basha duke sqaruar ngjarjen e ndodhur mbrëmjen e djeshme në godinat e konvikteve në Qytet Studenti.
Basha u ndalua nga recepsionistja ndërsa kryebashkiaku Veliaj e paditi me pretendimin se ka ushtruar dhunë ndaj saj.
Kreu i opozitës deklaron se shkoi aty pasi ishte i ftuar nga disa studentë për të parë si jetojnë dhe për të dëgjuar shqetësimet e tyre. Sipas tij ndalimi nga recepsionistja tregon intimidimin dhe frikësimin.
Reagimi i kryedemokratit Lulzim Basha:
Ngjarjet e 24 orëve të kaluara janë një pamje e qartë e realitetit me të cilin përballet Shqipëria.
Mbrëmë ishim të ftuar nga disa studentë për të parë si jetojnë dhe për të dëgjuar shqetësimet e tyre. Studentët tanë janë e ardhmja e këtij kombi, shqetësimet e tyre janë shqetësimet tona. Kjo është rruga jonë. Rruga e të dëgjuarit, e përfaqësimit të vërtetë të të gjithë shqiptarëve.
Kur mbërritëm në godinë u takuam me një punonjëse të konviktit, e cila na kërkoi të largoheshim. Kjo porosi erdhi nga lart.
Në fakt kjo është rruga tjetër, ajo e frikësimit dhe intimidimit.
Si shërbyes publik, nuk do të lejoj askënd që të më pengojë të dëgjoj problemet e bashkëqyetarëve të mi dhe të përpiqem t’i ndihmoj ata. Kjo është arsyeja pse u bëra pjesë e jetës publike.
Unë u bëj thirrje atyre që merren me kërcënime dhe frikësime, të rishqyrtojnë taktikat e tyre. Populli shqiptar do të dëgjohet!
