Presidenti i Parlamentit Europian, David Sassoli, gjatë fjalës së mbajtur në Kuvendin e Shqipërisë, ka përmendur si dy ngjarje kryesore për Shqipërinë për vitin 2019-ë, tërmetin e 26 nëntorit dhe përgjigjen negative për hapjen e negociatave me BE-në.
Sassoli tha se tragjedia i ka prekur të gjithë dhe shprehu mbështetjen e tij ndaj Shqipërisë. Përsa i takon negociatave, Sassoli tha se institucionet e Bashkimit Europian e kanë mbështetur procesin e integrimit të Ballkanit Perëndimor, duke theksuar se në të ardhmen shpresonte që edhe ‘skeptikët’ të reflektojnë dhe ti japin një mundësi Shqipërisë dhe Maqedonisë së Veriut.
“Kemi një histori për të shkruar së bashku dhe ajo që kemi shkruar 27 vende të BE-së nuk mjafton. Mënyra se si e shikoni ju këtë aspiratë është mënyra më e mirë që ata që mendojnë ti përballojnë vetëm sfidat botërore të binden. Ky ndalim nuk përfaqëson një ‘jo’, por është si të thuash një ndalim, siç ndodh shpesh në jetën politike.
Sepse e kuptuam se nuk donit të hiqnit dorë nga sezoni i reformave të mëdha në këtë vend dhe ky është një sinjal i rëndësishëm. Edhe në vendet tona kemi vështirësi, sikurse ju, lufta kundër korrupsionit dhe krimit të organizuar.
Vij nga një vend që ka pasur përmasa të theksuara të kriminalitetit, dhe mendoj se edhe ju dhet të merrni shembull nga ne”, tha Sassoli.
