Aktivisti dhe eksperti i ekonomisë, Pano Soko, ka ironizuar ligjin anti-KÇK, duke e cilësuar atë si fasadë.
Soko shkruan se Shqipëria vërtet ka nevojë për një operacion kundër gjithë KÇK së këtyre kohëve, por e para duhet të jetë gjithëpërfshirëse, dmth me gjykatës, prokurorë, politikanë, gjoja “biznesmenë” etj.
“Operacione të tilla duhen bërë me njerëz që dinë, juristë dhe ekonomistë.Nëse ka vërtet vullnet politik, një togë shoqërimi me policë mjafton. Se askush s’do bëjë mundje. Pa mbështetje politike, asnjë kriminel nuk ngre as kokën me e pa në sy, le më të bëjë boks”, shkruan Soko.
Reagimi nga Pano Soko
Tani, dakord filloi ky Operacioni Forca e Ligjit, po duket që si çdo operacion dhe ky do jetë thjesht fasadë.
Se që ta dini ju o çuna që po bëni pompa, u ka dasht me u stërvit në matematikë-financë, se do shkoni të kontrolloni bilance kompanish, deklarime sigurimesh shoqërore, kontrata të ardhurash, deklarata të ardhurash, letra makinash, letra pronash etj., s’do shkoni të bëni mundje.
Se çështja është, si do ia bëni hallit kur ju t’i kërkoni një robi lekët e vilës dhe të vijë ai robi dhe të sjellë një copë letër që shkruan “Kontratë shërbimi” të ekzekutuar në Zvicër që është edhe në gjermanisht, si do ta kuptoni a është e saktë apo jo? Se nuk u stërvitët për këtë, ju u stërvitët për boks. Apo pasi ta shihni do t’i thoni “Mire, kontratën e ke, hajde bëjmë një mundje tani. Po fitove ti, mbaje shtëpinë..”.
Fasadë, fasadë, vetëm fasadë.
Shqipëria vërtet ka nevojë për një operacion kundër gjithë KÇK së këtyre kohëve, por e para duhet të jetë gjithëpërfshirëse, dmth me gjykatës, prokurorë, politikanë, gjoja “biznesmenë” etj.
E dyta duhet bërë me njerëz që dinë. Mblidh juristë e ekonomistë, trajnoji dhe hidhi në terren. Nëse ka vërtet vullnet politik, një togë shoqërimi me policë mjafton. Se askush s’do bëjë mundje. Pa mbështetje politike, asnjë kriminel nuk ngre as kokën me e pa në sy, le më të bëjë boks.
S’na duhet një grup me Rambo që të ngrenë shtanga, se hallin me krimin deri më sot nuk e kemi pasur se na ka mbyt me grushta, e kemi se na ka mbyt me letra. Aty si t’ia bëjmë?
