Një ditë më parë mediat italiane njoftuan ndalimin e një shtetaseje shqiptare, rezidente në Itali, e cila deri në 2017 ka qenë pjesë e strukturave të Policisë së Shtetit,
Ajo u kap bashkë me një shqiptar tjetër me 38 gramë kokainë dhe tashmë ndodhet në masë sigurimi personal “detyrim paraqitje” vendosur nga gjykata.
Filloreta Zanaj 29-vjeçare, sipas një reagimi zyrtar të Policisë së Shtetit shqiptar, nuk është më pjesë e uniformave blu që prej vitit 2017.
“Ajo ka qenë efektive në Policinë e Vlorës dhe në vitin 2017 është larguar nga Policia e Shtetit pasi nuk fitoi të drejtën për t’u pajisur me certifikatë sigurie”, njofton zyrtarisht policia.
Mediat italiane raportojnë se 29-vjeçarja, rezidente në Itali, në komunën Garbagnate në provincën e Milanos, u ndalua nga karabinierët për kontroll dokumentesh.
Por disa lëvizje të dyshimta të saj kanë bërë që asaj t’i ushtrohet një kontroll më i imtësishëm i automjetit ‘Renault Clio’ ku ajo udhëtonte. Gjithashtu mësohet se në momentin e ndalimit ka qenë nën shoqërinë edhe të një personi tjetër, një 29-vjeçar me vendbanim në Arese.
Përballë pyetjeve të karabinierëve, dy shqiptarët fillimisht u përgjigjën normalisht, por qëndrimi i tyre i dyshimtë dhe i kujdesshëm i shtyu karabinierët që të kontrollonin dokumentet e tyre dhe makinën, duke zbuluar kokainën e fshehur, 38 gram e ndarë në 76 doza të mbështjella me letër alumini si dhe 1.430 euro, të konsideruara nga hetuesit si të ardhura nga veprimtaria e paligjshme e shitjes së drogës. Droga dhe shuma e konsiderueshme e eurove mbaheshin në një qese të fshehur në një ndarje në kroskotin e automjetit.
Dy të arrestuarit u dërguan në stacionin e policisë, ku kaluan natën në dhomat e sigurisë. Më pas ata u gjykuan nga një gjykatë në Milano e cila vendosi që 29-vjeçari të qëndronte në arrest shtëpie kurse inspektorja e policisë iu nënshtrua detyrimit për paraqitje në policinë gjyqësore.
