Një aksident i rëndë ka ndodhur mbrëmjen e sotme në kryqëzimin e Gjadrit, në Lezhë, ku janë përplasur tre automjete.
Sipas policisë, në ngjarje janë përfshirë mjetet me drejtues shtetasit I. B., P. N., dhe një shtetase e huaj me iniciale N. R. Si pasojë e përplasjes janë plagosur pesë persona tre drejtuesit e mjeteve dhe dy pasagjerë, bashkëshortja dhe vajza 6-vjeçare e njërit prej tyre.
Të plagosurit janë transportuar në spital dhe ndodhen jashtë rrezikut për jetën.
Njoftimi i policisë:
Lezhë/ Informacion paraprak. Rreth orës 18:20, në kryqëzimin e Gjadrit, janë përplasur tre automjete me drejtues shtetasit I. B., P. N., dhe me drejtuesen, shtetasen e huaj N. R. Si pasojë e aksidentit janë dëmtuar tre drejtuesit e automjeteve dhe dy pasagjerë që ndodheshin në automjetin e shtetasit I. B. (bashkëshortja dhe vajza e mitur, 6 vjeçe), të cilët janë transportuar në spital për ndihmë mjekësore dhe ndodhen jashtë rrezikut për jetën. Grupi hetimor ndodhet në vendngjarje dhe vijon punën për përcaktimin e shkaqeve dhe zbardhjen e plotë të rrethanave të aksidentit.
