“Tërhiquni nga rruga kriminale, nesër do të jetë vonë”. Është ky apeli i ministrit të Brendshëm, Sandër Lleshaj, gjatë prezantimit të paketës “anti-KÇK”, drejtuar kriminelëve.
“Një thirrje për atë që kanë humbur rrugën e ligjit; asnjëherë nuk është vonë për pendim. Tërhiquni nga rruga e krimit për të shpëtuar të ardhmen tuaj dhe të të afërmeve tuaj dhe fëmijëve tuaj. Kthjellohuni se keni përgjegjësi për vete dhe për ata që s’ju kanë borxh turpin. Është thjesht çështje kohë. Udhëtimi kriminal do të ndërpritet keq. Nëse sot, nesër.”, tha Lleshaj.
Ai bëri me dije gjithashtu se asetet kriminale të sekuestruara do të shkojnë për modernizimin e Policisë së Shtetit, ndërsa theksoi se paketa nuk i jep autoritet të ri policisë, pika më e kritikuar nga shoqëria civile dhe për të cilën reaguan sot edhe njësitë diplomatike.
“Shkatërrimi i këtij niveli biznesi është nevojë e dorës së parë. Shënjestra do të jetë pasuria e krijuar nga krimi i organizuar. Shkatërrimi i burimit ekonomik dhe financiar që mban gjallë krimin, këtij modeli të shëmtuar dhe të rrezikshëm që gjeneron krime të rënda, josh shumë të rinj në rrugë të gabuar. Operacioni do të zhvillohet në bashkëpunim me SPAK dhe partnerët në një kuadër të përcaktuar ligjor. Objekt do të jenë pasuritë e deklaruara apo të fshehura”, tha Lleshaj.
Sipas tij, suksesi i këtij operacioni do të jetë i garantuar.
“Një pjesë e aseteve do të vihen në dispozicion të policisë në funksion të modernizimit dhe personelit. Kriminelëve, u them tërhiquni nga rruga e krimit për të shpëtuar familjen, kthjellohuni dhe kuptoni se keni përgjegjësi për ata që vijnë pas jush. Është thjeshtë cështje kohe, udhëtimi kriminal do të ndërpritet keq, në mos sot nesër, por nesër do të jetë vonë”, tha ai.