Pas 10 ditëve Premier Liga rikthehet të luajë javën e 25-të të kampionatit.
Ditën e sotme luhen 8-të sfida, ndërsa spikasin ato me Leicesterit dhe Chelseat, Liverpool kundër Southampton dhe Man.United kundër Wolverhampton.
Leicester-i së fundmi ka lëshuar shumë nga ajo formë fantastike që përjetoi në pjesën e parë të sezonit. Por përsëri “Dhelprat” gjenden në pozita të favorshme, pasi janë forca e tretë e kampionatit, 8-të pikë më shumë se Chelsea i vendit të katërt dhe një rezultat pozitiv në shtëpi kundër “bluve” mund të çimentojë këtë pozicion për skuadrën.
Ndërsa nga ana tjetër Chelsea, ka distancë sigurie me vendin e pestë që mbahet nga United, duke qenë 6 pikë në avantazh. Gjithsesi synimi i londinezëve është vendi i tretë pasi një fitore ditën e sotme e shkurton diferencën në 5 pikë me Leiçesterin, duke e bërë objektivin e tyre më të arritshëm në 13 javët e fundit.
Liverpooli i Jurgen Klopp po zhvillon një kampionat më vete, dhe duket se në këtë pikë ata nuk njohin kundërshtarë në ishull. Edhe pse kryesojnë me plot 19 pikë avantazh nga ndjekësi më i afërt, “Të Kuqtë” janë mëse të motivuar të vazhdojnë me ecurinë rekord të tyre. Por gjithsesi fitorja nuk do të jetë e lehtë në këtë ndeshje pasi kundërshtarët e Southhampton, të cilët “notojnë” në mesin e tabelës po kalojnë një formë të mirë teksa në 5 ndeshjet e fundit regjistrojnë 3 fitore ndërsa kanë barazuar një dhe humbur një ndeshje.
Ndryshe është gjendja e Te Manchester United. “Djajtë e Kuq” duket se po veniten ndeshje pas ndeshje dhe objektivi i vendit të katërt sa vjen e bëhet më i vështirë. Shkaktarë të kësaj gjendjeje janë edhe dëmtimet e shumta në skuadër, ku mjaftojmë të përmendin që dy yjet e skuadrës, Pogba dhe Rashford nuk janë të disponueshëm. Si të mos mjaftonte kjo, përballë do të kenë një skuadër që është kockë e fortë për këdo pasi Wolverhampton renditet e shtata me 34 pikë të grumbulluara po aq sa ka dhe United.
