Avokati Ledio Braho e cilësoi “shmangie të përgjegjësisë” veprimet e Prokurorisë së Posaçme kundër Korrupsionit dhe Krimit të Organizuar, që shpalli mos-kompetencë për “dosjen 184”.
“S’janë mohuar që përgjimet janë bërë nga prokuroria, së paku SPAK duhet të kishte pyetur personat që kanë dalë në përgjime dhe më pas të kryente hetime të tjera. Kthimi për mos-kompetencë është shmangie e përgjegjësisë për tu marrë me çështje banale dhe jo me ato çështje që është krijuar. Çështje të tilla si ajo e dosjes 184 duhet të ishin pranuar e të ishin nisur hetimet. Kjo është një tregues se sa seriozisht e ka marrë punën SPAK-u”, tha avokati në studion e “Ora News”.
Pas një “ping-pongu” mes Prokurorisë së Krimeve të Rënda dhe asaj të Dibrës për “dosjen 184”, akuza e qytetit verior vendosi muajin e kaluar t’ia kalonte çështjen SPAK-ut. Më konkretisht, më 22 Janar, Prokuroria e Dibrës ka shpallur mos-kompetencë për dosjen dhe i ka dërguar aktet te Prokuroria e Posaçme. Ndërkohë, SPAK me një vendim të datës 27 Janar, ka vendosur mospranimin e akteve dhe ridërgimin e dosjes te Prokuroria e Dibrës.
Dosja “184” bën fjalë për manipulimet e zgjedhjeve në Dibër në votimet e shtatorit 2016 për kryetarin e bashkisë. Procedimi është regjistruar në hetim për veprat “Përdorimi i funksionit publik për veprimtari politike ose zgjedhore” dhe “Korrupsioni aktiv në zgjedhje”.
