Anëtarja e re e SPAK betohet në Presidencë/ FOTOT

Anëtarja e Prokurorisë së Posaçme kundër Korrupsionit dhe Krimit të Organizuar, Doloreza Musabelliu u betua sot para Presidentit të Republikës Ilir Meta.

Në Institucionin e Presidentit të Republikës u zhvillua ceremonia e betimit të prokurores më të re të Prokurorisë së Posaçme kundër Korrupsionit dhe Krimit të Organizuar.

“Presidenti i Republikës Ilir Meta i uroi suksese dhe punë të mbarë prokurores më të re të Prokurorisë së Posaçme (SPAK), znj.Musabelliu. Në ceremoninë e betimit ishin të pranishëm edhe Kryetari i Këshillit të Lartë të Prokurorisë, z.Gent Ibrahimi, si dhe Kryetari i Prokurorisë së Posaçme kundër Korrupsionit dhe Krimit të Organizuar, z.Arben Kraja”, thuhet në një njoftim të presidencës.

LEXO EDHE  Rritja e rasteve me koronavirus/ Mjeku shqiptar: Kjo është vala e parë

KLP miratoi këtë të premte me shumicë votash projekt-aktin “Për emërimin e prokurores Doloreza Musabelliu në Prokurorinë e Posaçme kundër Korrupsionit dhe Krimit të Organizuar për një mandat 9-vjeçar pa te drejte riemërimi”.

Kështu, Doloreza Musabelliu, ish-prokurore e Krimeve të Rënda, i bashkohet trupës aktuale prej 8 prokurorësh, pas konfirmimit së fundmi në detyrë, me vendim të formës së prerë nga strukturat e Vetingut.