Gjashtë persona u arrestuan nga policia gjermane në Neu-Ulm në kuadër të një operacioni që çoi në sekuestrimin e rreth 500 kg kokainë.
Lënda narkotike ishte fshehur mes kutive me banane të porositura nga një shitës me shumicë në zonë, i cili lajmëroi policinë pasi kreu kontrollin e zakonshëm të cilësisë së mallit duke vërejtur pako të dyshimta në kutitë e banave.
Lënda narkotike u gjet në dy kamionë me banane që kishin zbarkuar nga një port në Holandë.
Në operacionin e policisë për kapjen e personave që prisnin të merrnin lëndën narkotike u angazhuan helikopterët, forcat speciale dhe qentë anti-drogë.
Të arrestuarit janë gjashtë burra të moshës 24 deri në 39 vjeç. Pesë prej tyre janë shtetas shqiptarë, dhe tjetri nga Rumania. Policia dyshon se të arrestuarit udhëtuan nga vendlindja për në Bavari posaçërisht për këtë krim dhe do të ishin larguar menjëherë më pas.
“Vetëm përmes një bashkëpunimi të ngushtë ndërkombëtar, autoritetet e sigurisë mund të vazhdojnë të luftojnë trafikun e organizuar të drogës“, tha Robert Heimberger, Presidenti i Zyrës së Policisë Kriminale të Shtetit bavarez në një deklaratë të përbashkët për shtyp nga zyra e prokurorit publik Memmingen dhe Zyra e Policisë Kriminale të shtetit bavarez.
