Ramush Haradinaj, Kryeministri në detyrë i Kosovës, ka refuzuar samitin që do të mbahet në Tiranë, më 21 dhjetor, për atë që njihet tashmë si Shengeni Ballkanik. Kështu pas Vovi Sad dhe Ohrit, ku u mbajtën takimet mes Kryeministrit Edi Rama, homologut nga Maqedonia e Veriut, Zoran Zaev dhe Presidentit serb, Aleksandar Vuçiç, takimi i 3-të do të mbahet në Tiranë.
Ndërkohë, Kryeministria ka sqaruar se në këtë samit është ftuar Presidenti Hashim Thaçi, duke qenë se në Kosovë ende nuk është krijuar qeveria e re.
“Nisur nga një deklarate e bere nga kryeministri i dorëhequr i Kosovës sqarojmë se duke pasur parasysh formatin e takimeve rajonale si edhe faktin që në Kosove ende nuk është formuar qeveria e re, Kosova është ftuar në nivelin më të lartë njësoj si ne takimin e Ohrit, përmes ftesës drejtuar Presidentit të Republikës së Kosovës, Hashim Thaçi”, thuhet në njoftimin zyrtar të Kryeministrisë.
Donjeta Gashi, drejtoreshë e Zyrës për Komunikim me Publikun në Qeverinë e Kosovës shprehet se Qëndrimi i Kryeministrit në detyrë Haradinaj sa i përket temave që janë trajtuar në takime të tilla, siç është rasti i Minishengenit, tashmë janë të qarta.
Ajo thotë se Prishtina zyrtare njeh si të vetmen nismë për Ballkanin, procesin e Berlinit.
“Kosova ka qenë aktive në raport me përgjegjësitë e saja që ka pasur edhe në Ballkan dhe ka luajtur rol të rëndësishëm në krijimin e paqes dhe fqinjësisë së mirë. Për këtë arsye ne e kemi vlerësuar dhe kemi qenë të angazhuar në procesin e Berlinit, si një nga nismat me të qëlluara të Kancelares Merkel, për të ardhmen e Ballkanit. Këto janë procese kredibile, për të cilat si qeveri kemi pasur përgjegjësi të plotë në raport me obligimet tona si Kosovë”, thekson ajo.
Axhenda e Samitit që do të mbahet në Tiranë nis me takimin informal të premten, për të vijuar me eventin e organizuar në parkun olimpik për të mbijetuarit nga tërmeti.
Në ditën e dytë, është parashikuar vizitë në zonat e dëmtuara nga tërmeti në Durrës dhe më pas diskutimet mes liderëve do të finalizohen me një konferencë të përbashkët për shtyp, në Tiranë.
