Një 26-vjeçar është vendosur në pranga pasi hodhi fishekzjarrë në stadiumin “Air Albania” gjatë derbit Partizani-Tirana. Sipas njoftimit policor, bëhet fjalë për personin me inicialet A.B, banues në Tiranë.
26-vjeçari u identifikua nëpërmjet filmimeve të kamerave të sigurisë, ku shihej teksa hidhte fishekzjarrë në kohën që zhvillohej ndeshja Partizani-Tirana.
Ndërkohë, vijon bashkëpunimi i Policisë, Prokurorisë dhe stafit të menaxhimit të stadiumit për të identifikuar dhe proceduar penalisht e administrativisht të gjithë ata tifozë që kanë dëmtuar stolat në tribunat e stadiumit dhe kanë hedhur fishekzjarrë gjatë zhvillimit të ndeshjes.
NJOFTIMI I PLOTË:
Tiranë
Hodhi fishekzjarrë në stadiumin “Air Albania” gjatë derbit Partizani-Tirana, identifikohet nga kamerat e sigurisë.
Vihet në pranga 26-vjeçari për veprën penale “Veprime të dhunshme në aktivitet sportive”.
Në kuadër të masave të marra nga Policia e Tiranës, për garantimin e rendit dhe sigurisë para, gjatë dhe pas përfundimit të aktivitetit sportiv që u zhvillua në “Air Albania Stadium”, mes ekipeve Partizani dhe Tirana, në lidhje me fishekzjarrët e hedhura në fushë gjatë ndeshjes, nga specialistët për hetimin e krimit në Komisariatin e Policisë Nr. 1 është bërë arrestimi në flagrancë i shtetasit:
A. B, 26 vjeç, lindur dhe banues te “Bregu i lumit”, Tiranë.
Arrestimi i këtij shtetasi u bë sepse më datë 13.12.2019, rreth orës 19:10, ka hedhur fishekzjarrë në stadiumin “Air Albania”, Tiranë, në kohën që zhvillohej ndeshja e futbollit Partizani – Tirana. Ky shtetas u identifikua nga ana e Policisë nëpërmjet kamerave të sigurisë.
Materialet procedurale i kaluan Prokurorisë se Rrethit Gjyqësor Tiranë, për veprën penale “Veprime të dhunshme në aktivitet sportive”.
Gjithashtu, nga Komisariati i Policisë Nr. 1 vijojnë veprimet në bashkëpunim me Prokurorinë dhe stafin e menaxhimit të stadiumit, për të identifikuar dhe proceduar penalisht e administrativisht të gjithë ata tifozë që kanë dëmtuar stolat në tribunat e stadiumit dhe kanë hedhur fishekzjarrë gjatë zhvillimit të ndeshjes.
