Nga Boldnews.al
Mund të jesh nëpunës i shtetit, mund të jesh i papunë, por idhtar i Rilindjes, mund të jesh biznesmen, mund të jesh edhe një hiç…, por fëmijën ti e ke dikush, sot dhe të nesërmen. Ju prindër që dërguat fëmijët në sheshin Skënderbej, si dekor i kryebashkiakut dhe kryeministrit Edi Rama, a jeni penduar?
I nisët atje engjëjt e tu si dekor për Lali Erin dhe Edi Ramën, por ai, kryeministri yt, u nxorri gishtin e mesit. Për turpin e tij, por më shumë tonin si shoqëri, shumë qeshnin, por ishte dhe është për të qarë, ju të parët, ju prindërit e atyre fëmijëve që u gjetën para atij gjesti.
A ju kanë pyetur vogëlushët në shtëpi çdo të thotë të nxjerrësh gishtin e mesit? Me siguri do tu keni shpjeguar: “është turp, mos e bëni më”… Po nëse ju shprehen, përse kryeministri e bëri kur është turp? Po ju prindër çfarë përgjigje do u jepni? Mos do u thoni se Ed Gishtmesit i shkon ky gjest, sepse ai është më i madhi i të gjithë kohërave. Atij i lejohet të fyejë, të përçudnojë një popull, që e ndiqte aty në sheshin Skënderbej dhe qindra mijërave të tjerë nga televizori.
Kryeministri ua tregoi gishtin një grupi të rinjsh protestues, por gjestin e bëri fare pranë dhjetëra fëmijëve të mitur të veshur si “babagjyshë” dhe gëzonin atë moment festiv, kur kryebashkiaku ndezi dritat në pemën e Vitit të Ri. Me siguri ju prindër e patë edhe Lali Erin sa me endje dhe me një delir të brendshëm reagoi kur pa gishtin e mesit të kryeministrit, bashkëpunëtorit të tij, pjellës së tij politike. Por Lali ishte i qetë, fëmijën e tij nuk e kishte aty. Ai madje as në rrjetet sociale nuk e publikon. Në pak foto që hedh me të, kujdeset që ti mbulojë fytyrën, e ruan birin e tij dhe më të drejtë. Po fëmijën tënd, në çerdhe, kopsht, shokollë e rrugë përse ta publikon pa të pyetur Lali Eri yt?!
Fëmijët nuk lejohet që të përdoren në rrjetet sociale, aq me keq për evenimente politike. Por djali yt, vajza jote duhet të shërbejë si dekor për pushtetarin. Duhet të jetë në shërbim të një politike të ndyrë që për të pastruar imazhin e tyre përdorin krijesat e një qytetari, rrogëtari, idhtari apo të papuni.
Shumë reaguan kur ambasadori i OSBE-së në Tiranë Bernd Borchardt tregoi gishtin e mesit një grupi grashë të Unazës së Re që protestonin për lirimin e fëmijëve të tyre të arrestuar dhunshëm nga policia. Ambasadori nuk duroi kur turma thirri: “Rama ik” dhe “Shame on you”. Ai kërkoi falje për këtë gjest, por një falje të thatë, pa asnjë pendesë të dukshme, çka detyroi edhe kreun e shtetit që ta shpallte person të padëshirueshëm, duke mos e pranuar në presidencë.
Kryeminitri bën të njëjtin veprim, edhe më të rëndë, pasi “Ed Gishtmesi” kreu gjestin e shëmtuar në sy të dhjetara fëmijëve të mitur. Ata nuk e dinë çfarë është politika, me siguri gjestin me gishtin e mesit e përtypin me mendjen e tyre se çfarë do të thotë. Janë të pafajshëm, të padjallëzuar, janë e ardhmja e vendit, ndoshta disa prej tyre do i futen politikës në të ardhmen e largët, por të jeni të bundur ju prindërit e tyre se ata nuk do bëjnë siç bëri Lali Eri dhe “Ed Gishmesi”, por nëse do të ushqehen me frymën e urrejtjes dhe fyerjes, atëherë faji është i juaji si prindër.
Për partinë ti i rritur jepe edhe “jetën” nëse dëshiron. Ke pranuar që truri yt të kalojë në lavazh, e do këtë kastë politike, e çdongjyre qoftë, por fëmijën mbaje larg, edhe pse është krijesa jote, nuk ke të drejtë të abuzosh psikologjikisht me të, duke e dërguar për dekor para dy politikanëve që për propagandë nuk njohin as etikë, as ligj, e as Kanun e moral.
